Almaty qalalyq Polısıa departamentiniń málimetinshe, jalǵan aqparat bergen azamattarǵa qatysty qylmystyq ister qozǵalyp, bes istiń beti ashylǵan, dep habarlaıdy aqshamnews.kz
Quqyq qorǵaý organdary Qazaqstan Respýblıkasynyń Qylmystyq kodeksiniń 273-baby boıynsha terorızm aktisi týraly kórineý jalǵan habarlaǵany úshin bes myń aılyq eseptik kórsetkishke (14,5 mln teńge) deıin aıyppul salynatynyn nemese sol mólsherde túzeý jumystary, sondaı-aq bes jylǵa deıin bas bostandyǵynan aıyrý jazasy qarastyrylǵanyn eskertedi.
Jalǵan qońyraýlardyń saldarynan barlyq shuǵyl qyzmetter bosqa jumyldyrylyp, memleket qarajaty shyǵyndalady. Sot tártibimen bul shyǵyndardy ótep berý mindeti quqyq buzýshyǵa júkteledi. Eger kináli tulǵa 14 jasqa deıingi bala bolsa, onda onyń ata-anasy nemese zańdy ókilderi zalaldy óteıdi. Mundaı jaǵdaıda 20 AEK-ke (73 840 teńge) deıin aıyppul salynady nemese 10 táýlikke deıin ákimshilik qamaýǵa alynady. Sonymen qatar, jasóspirimder kámeletke tolmaǵandardyń isteri jónindegi bólimshelerge esepke alynady.
İshki ister mınıstrliginiń derekteri boıynsha, elimizde terorızm aktisi týraly jalǵan habarlama taratqan azamattarǵa qatysty 168 qylmystyq is qozǵalyp, 31 adam ustalǵan. Olardyń 12-si kámeletke tolmaǵan balalar. Sot úkimimen 13 adam jazalanyp, onyń ishinde eki jasóspirim sottalǵan. Alty ata-anaǵa aıyppul salynǵan.
İİM resmı ókili Shyńǵys Alekeshev: – Árbir jalǵan habarlama qoǵamda úreı týǵyzyp, mekemelerdiń jumysyn toqtatady. Sonymen birge shuǵyl qyzmetterdiń ýaqyty men resýrstaryn bosqa jumsaıdy. Mundaı qylmys úshin 14 jastan bastap qylmystyq jaýapkershilik qarastyrylǵan. Kámeletke tolmaǵan balalardyń ata-analaryna balalarynyń minez-qulqyna erekshe nazar aýdaryp, osyndaı áreketterdiń saldaryn túsindirý qajet. Terorızm aktisi týraly jalǵan habarlama taratqandar qatań jazalanatynyn este saqtańyzdar. Qoǵamdyq tártip – barlyǵymyzdyń ortaq mindetimiz. Birlesip qana, biz balalarymyz úshin qaýipsiz orta qura alamyz, – dedi.