«Terenkýr» demalys aımaǵynyń toǵanynda qysqy túbıńterge arnalǵan 50 metrlik syrǵanaq salyndy. «Snejnaıa gorka» áleýmettik jobasy jeke qarjy esebinen ornatyldy. Bul úshin kúzde toǵan sýy qurǵatylǵan. Qysqy syrǵanaq tebý maýsym aıaqtalǵan soń qurylym buzylady.
Syrǵanaqtyń basty ereksheligi, onyń toǵanǵa ornalasýy jáne syrǵanaq tebýge qaýipsiz. 20 gradýs buryshtyq qurylym 5 bólikke bólingen, árqaısysy arnaıy tormen qorshalǵan. Al márede tejegish tor jáne arnaıy jumsaq qaptar bar.
Jobanyń ıdeıalyq shabyttandyrýshysy Baýyrjan Ermaǵanbetov aıtqandaı, syrǵanaq jasaýdy kún jyly kezde oılastyrǵan.
- Munda jazda otbasymmen jıi serýendeımin. Qysta toǵanda sý joq, tótenshe jaǵdaıǵa oryn almas úshin qurǵatylǵan. Qysta toǵan bos turady, esh paıdasy joq. Medeý aýdanynda syrǵanaq joq bolǵasyn syrǵanaq ornatqym keldi. Qysta balalar qydyratyn jer az, atraksıondar jumys istemeıdi. Halyqtyń tyǵyzdyǵy jyl sanap artyp keledi. Balalarǵa qaýipsiz alań qajet, - deıdi ol.
Onyń aıtýynsha, basty mindet 5 jastan asqan balalardyń ata-anasyz jáne densaýlyǵyna qaýip tóndirmeı qaýipsiz syrǵanaý bolǵan.
- Syrǵanaqtyń qurylymyn jobalap, zaýytqa tapsyrys berdik. Sál keshigip ashtyq. Nysan qańqasy temir, biraq óte senimdi. Júk kótergishtigi bir sharshy metrine 250 kg. Qurylym shamamen eki apta jınaldy.
- Joba ákimdikpen, Oqý-aǵartý mınıstrligimen birlesip júzege asty. Biz az qamtylǵan otbasylardyń balalaryna áleýmettik qyzmetterdi tegin usynamyz. Kópbalaly otbasylardy, múgedekter men zeınetkerlerdi kútemiz, - deıdi syrǵanaqtyń ıdeıalyq shabyttandyrýshysy Baýyrjan Ermaǵambetov.
Tórt balanyń ákesi Baýyrjan árqashan balalarynyń bos ýaqytyn tıimdi ótkizýdi oılaıdy.
- Úlken balam jasóspirim. Qazir balalar gadjetterge táýeldi, kompúterge kóp ýaqytyn jumsaıdy. Olar fızıkalyq turǵyda damymaıdy, al ol balanyń aǵzasyna óte qajet. Olar qozǵalýy kerek, aýamen tynys alýy kerek. Qandaı da bolsa sportpen aınalysý qajet. Syrǵanaý bul keremet nárse, balalar kóńil kóteredi, jaǵymdy emosıa alyp, qozǵalady, adrenalın alady. Ásirese, qysta taýdyń aýasy adamdy shynyqtyrady, - dedi ol.
Toǵannyń túbi balshyqtan tazartylyp, balas tóselgen.
- Bul zaýyttyń sharty edi, óıtkeni mundaı qurylymdar qaýipsiz bolýy kerek. Bizde tehnıkalyq tapsyrma túbine jetý boldy. Balshyq shaǵyn eskalatormen tazartylyp, balas tóseldi. Biz ony birinshi qabatpen deńgeıles ornattyq, - deıdi Baýyrjan.
- Bul orynnyń ózi kóńildi jaılandyratyn tamasha jer, kóptegen almatylyq osylaı oılaıtyn bolar. Qysta toǵan únemi bos turatyn. Eshkimge paıdasy joq edi. Óz balonymen syrǵanaý tegin. Bizdiń tarapymyzdan bul durys qadam. Biz munda eshkimge zıan tıgizbeımiz, tıgizgimiz de kelmeıdi, - dedi ol.
Dostarymen birge syrǵanaýǵa kelgen turǵyn Batyrhan Berdimuratov te áserin aıtty.
- Syrǵanaq týraly dosym aıtyp, meni shaqyrdy. Bizge óte unady, qala ortalyǵyna kelip, balonmen syrǵanaýǵa bolady. Bul jerdiń aýasy taza, adrenalın aldym. Osy jerge áli kelemin, - deıdi Batyrhan.
Syrǵanaq tebýshiler arasynda balalaryn ákelgen erli-zaıyptylar da boldy.
- Qalaǵa barǵanǵa alys, onyń ústine jınalyp, zattardy, tamaqty ózińizben birge alý kerek. Bul syrǵanaq týraly jaqynda estip, kózimizben kórýge keldik. Menińshe, óte qaýipsiz jer, kishkentaı balalar da qaýipsiz syrǵanaı alady. Bizge óte unady, balalardy demalys kúnderi jıi jiberip turamyz, - dedi almatylyq Dıdar Sydyqov.
Syrǵanaq tepken soń demalýshylar úrlemeli balondy qurylym basyna ózderi alyp shyqpaıdy, ol úshin arnaıy fýnıkýler bar. Bul rette, kelýshiler qaýipsizdik tehnıkasyn úıretetin nusqaýshylardyń baqylaýynda bolady.
Buǵan qosa, keshen aýmaǵynda qoǵamdyq tamaqtaný nysandary ornatylyp, terrassada demalys aımaǵy uıymdastyrylady.
Balondy bir saǵatqa jalǵa alý quny 3 myń teńge. Bir rettik syrǵanaý - 500 teńge. Tıisti qujatyn kórsetken áleýmettik osal sanattaǵy turǵyndarǵa qyzmet tegin.