Eýrazıa ulttyq ýnıversıtetiniń IT mamandary qazaq tiliniń qoldanys aıasyn keńeıtip, tegin sıfrlyq ónimder jasaýda.
«Qyzyqty onomastıka» jańa mobıldi qosymshasy adam esiminiń, geografıalyq nysandardyń, janýarlar men qustardyń maǵynasy men shyǵý tegin bilýge múmkindik beredi, dep habarlaıdy Almaty-akshamy.kz.
QR Ǵylym jáne joǵary bilim mınıstrliginiń málimetinshe, EUÝ IT mamandary qazaq tilinde «Qyzyqty onomastıka» mobıldi qosymshasyn ázirledi. Jańa sıfrlyq ónim 800-den astam jeke ataýlardy biriktiredi. Olar 100-den astam semantıkalyq belgiler boıynsha toptastyrylǵan jáne bul baǵdarlamanyń basty artyqshylyǵyna aınaldy. Mobıldi qosymshany paıdalanýshylarǵa sábıine esim tańdaýǵa nemese óz esiminiń maǵynasyn bilý múmkindigi de usynylǵan.
«Prezıdent óz sózinde memlekettik tilde sıfrlyq ónimderdi arttyrýdyń mańyzdylyǵyn atap ótti. Biz kópshilik úshin yńǵaıly «Qyzyqty onomastıka» mobıldi qosymshasyn iske qostyq. Barlyq ataýlar semantıkalyq qasıetteri boıynsha toptastyrylǵan, bul - bizdiń jobamyzdyń biregeıligi. 1,5 jyl boıy tabandy eńbek ettik, kóptegen jumystar men materıaldar zertteldi. Bizdiń qosymshamyz áıel men er adamdar esimderiniń shyǵý tilin, etımologıasyn bilýge múmkindik beredi. Eger sizdiń esimińiz birneshe sózden tursa, olardyń árqaısysynyń jeke maǵynasyn taba alasyz. Sondaı-aq sıfrlyq platformada alfavıt boıynsha suryptaý bar, paıdalanýshylarǵa yńǵaıly bolý úshin izdeý tarıhy saqtalady jáne siz tańdaǵan esimderdi bólek saqtaýǵa bolady», - dep atap ótti joba jetekshisi, L.N. Gýmılev atyndaǵy EUÝ Sıfrlyq damý jáne qashyqtyqtan oqytý departamentiniń dırektory Gúlmıra Bekmanova.
Sıfrlyq platformada yńǵaıly navıgasıa jáne jyldam izdeý júıesi bar. Mobıldi qosymsha qazir Android platformasynda qoljetimdi.