Italıa quramasyn tize búktirdi
Qazaqstan jasóspirimder quramasy Prosteev qalasynda (Chehıa) 14 jasqa deıingiler arasynda ótip jatqan komandalyq álem chempıonatynyń (2022 ITF World Junior Tennis Finals) shırek fınalyna shyqty, dep habarlaıdy Almaty-akshamy.kz.
Qazaqstan tenıs federasıasynan málim etkenindeı, jarystyń úshinshi kúni qazaqstandyq jasóspirimder aıdy aspanǵa shyǵaryp, álem chempıony – Italıa quramasyn tize búktirdi. Kortqa keshe Argentına quramasymen sátti oınaǵan Danıel Tazabekov alǵashqy bolyp shyǵyp, Salvatore Tartalonemen sheberlik baıqasty. Birinshi partıada Danıel qarsylasyna birde-bir geım bergen joq – 6:0. Ekinshi sette besinshi geımde breık jasap, sol basymdylyǵynan aırylmady – 6:3. Zańǵar Nurlanuly men Antonıo Marıláno asa tartysty báseke ótkizdi. Birinshi partıada ıtalıalyq sportshy basymdylyq tanytty – 6:4. Ekinshisinde de ol 3:1 esebimen alǵa ketti. Degenmen, Zańǵar tarazy basyn teńestirip qana qoımaı, setti óz paıdasyna jazdy – 6:4. Úshinshi, sheshýshi partıada segizinshi geımde qazaqstandyq tenısshi breık jasaı aldy – 5:3. Sodan keıin ózi dop bergende, núkte qoıa bildi – 6:3. Osylaısha, álem chempıondaryn utqan Qazaqstan jasóspirimder quramasy óz tarıhynda alǵash ret dúnıejúzilik dodanyń shırek fınalyna shyǵyp, úzdik segiz komandanyń qataryna endi. Eske sala keteıik, budan buryn tenısten álem chempıonatynda qazaqstandyq jasóspirimderdiń Argentına quramasyn utqanyn jazǵan bolatynbyz.