Sý jolynyń uzaqtyǵy – 500 metr
Kaspııde ótip jatqan jaýyngerlik daıarlyq sabaqtary sheńberinde teńiz jaıaý áskerleri quramasynyń mehanık-júrgizýshileri júzý kezinde brondy transporterlerdi basqarý jattyǵýlaryn ótkizýde, , dep habarlaıdy Almaty-akshamy.kz.
Jabdyqtalǵan oqý oryndaryna júzip barmas buryn, sý kedergilerin eńserý kezinde qaýipsizdik tehnıkasynan teorıalyq sabaqtar ótkizildi. Sondaı-aq, nusqaýshylar mehanık-júrgizýshilerge jaýyngerlik tehnıkany daıyndaý jáne tekserý tártibin, ony biteý sharalaryn, qutqarý-kóshirý qyzmetin jáne baılanysty uıymdastyrý is-qımyldaryn túsindirdi.
«Áskerı qyzmetshiler jattyqtyrý keshenderinde praktıkalyq is-qımyldy pysyqtap, arnaıy alańdarda normatıvterdi oryndady. Osydan keıin ǵana jaýyngerler BTR-82A brondy transporterlerinde júzýge jiberildi», – dedi brıgada komandıriniń qarý-jaraq jónindegi orynbasary gvardıa podpolkovnıgi Aslan Nurjanov.
Qazirgi ýaqytta teńizshiler sý kedergilerin eńseretin tehnıkamen jumys isteýde. Jaýyngerlik mashınalarda júzý jaǵalaý syzyǵy boıymen jaǵadan 50 metr qashyqtyqta ótedi. Sý jolynyń uzaqtyǵy – 500 metr. Jattyǵý ótetin sýdyń tereńdigi eki metrden asady. Kúrdeli jaǵdaıda tapsyrmalardy oryndaý kezindegi ekıpajdardyń úılesimdi is-qımyldary da erekshe nazarda bolady.
Sý kedergilerin eńserý manevrlerine 100-den astam áskerı qyzmetshi, 20-dan astam jaýyngerlik jáne arnaıy tehnıka jumyldyryldy. Sabaqtardyń qaýipsiz jaǵdaıda ótýin jaýyngerlik júzgishter komandasy, jyldam júretin kater jáne arnaıy kóshirý tehnıkasy qamtamasyz etedi. Jattyǵý sabaqtary 19 tamyzǵa deıin jalǵasady.