Memleket bakalavrıat boıynsha 75 myńnan astam grant bóldi
Talapkerler tehnıkalyq mamandyqtarǵa qyzyǵýshylyq tanytpaıdy. Bul týraly Ǵylym jáne joǵarǵy bilim mınıstrligine qarasty joǵary jáne joǵary oqý ornynan keıingi bilim departamenti dırektorynyń orynbasary Erjan Ámirbekuly málim etti, dep habarlaıdy Almaty-akshamy.kz QazAqparatqa silteme jasap.
«Keshe respýblıkalyq baıqaý komısıasy óz jumysyn aıaqtady. Konkýrs qorytyndysy boıynsha memlekettik bilim grantynyń ıegerleri anyqtaldy. Memleket bakalavrıat boıynsha 75 myńnan astam grant bóldi. Qazirgi ýaqytta talapkerler arasynda pedagogıka, stomatologıa, saıasattaný, halyqaralyq qatynastar sıaqty mamandyqtar tanymal. Al, mehanıka, aýyl sharýashylyǵy, toqyma ónerkásibi tehnologıasy salalaryna qyzyǵýshylyq tanytqandar az», - dedi Erjan Ámirbekuly.
Onyń aıtýynsha, Memleket basshysynyń tapsyrmasy boıynsha bıyl granttardyń 60 paıyzy tehnıkalyq mamandyqtarǵa baǵyttalǵan.
Sonymen qatar, Úkimet halyq tyǵyz ornalasqan aımaqtar men batys óńirlerinen ótinish bergen talapkerlerge qosymsha 10 myń grant bóldi.
Búginde onyń 2 myńnan astamy berilgen. Konkýrs komısıasy qalǵan grantty bólý jumysymen aınalysyp jatyr.
Erjan Ámirbekulynyń málimetinshe, memlekettik bilim granttarynyń bir bóligi áli bólinbegen.
Olardy taǵaıyndaý - konkýrs komısıasynyń quzyrynda. Resmı derekke sáıkes, memlekettik grantqa 79 myńǵa jýyq talapker ótinish joldaǵan.
Qazirgi tańda talapkerlerdiń keıbiri túrli sebeptermen óz grantynan bas tartqan. Olar basqa talapkerler arasynda bólinedi.
Eske sala keteıik, búgin memlekettik bilim granty ıegerleriniń tizimi jarıalanǵan bolatyn.