Jeltoqsan aıynda teńge baǵamy odan ári quldyraýy múmkin
Teńgeniń álsireýi qarqyndy túrde jalǵasýda: KASE bırjasynda ótken kúngi saýda-sattyqtyń qorytyndysy boıynsha dollar baǵamy 525 teńgege jýyqtady. Sarapshylar jaǵdaıdyń odan ári nasharlaý yqtımaldyǵyn joqqa shyǵarmaıdy, dep habarlaıdy aqshamnews.kz
Qazaqstan qarjygerleri qaýymdastyǵy (QQQ) óz naryq sholýlarynda jeltoqsannyń alǵashqy aptasy teńgeniń kezekti álsireýimen bastalǵanyn atap ótti. Saýda kólemi 156,8 mıllıon dollarǵa deıin ósken. Ulttyq ekonomıka mınıstri Baıbazarov teńgeniń álsireýin syrtqy faktorlarmen – rúbldiń qunsyzdanýymen, munaı baǵasynyń tómendeýimen jáne dollardyń jahandyq nyǵaıýymen baılanystyrdy.
Sarapshylardyń aıtýynsha, teńge qarasha aıynda 5 paıyzǵa álsiregen, degenmen Ulttyq bank ıntervensıalar júrgizip, jalpy 2,4 mıllıard dollar satqan bolatyn. Sondaı-aq, kvazımemlekettik sektor kásiporyndary dollarlyq túsimderiniń jartysyn satýǵa mindetteldi. Alaıda, jeltoqsan aıynda Ulttyq bank tek 800–900 mıllıon dollar satýdy josparlap otyr. Bul teńgeni «qutqarý» úshin basqa sharalar qabyldaýǵa týra keletinin bildiredi.
Ulttyq bank taǵy da ıntervensıalar júrgizýge, kvazımemlekettik kompanıalardy valútalyq túsimderiniń úlken bóligin satýǵa mindetteýge nemese bazalyq mólsherlemeni shuǵyl túrde qaıtadan kóterýge májbúr bolýy múmkin (qatarynan ekinshi ret).
Barlyq osy faktorlar jeltoqsan aıynda ulttyq valútanyń taǵy da qıyn jaǵdaıǵa tap bolatynyn boljaýǵa negiz beredi.