Onyń sebepterin QR Ulttyq bank tóraǵasy Ǵalymjan Pirmatov atady, dep habarlaıdy Almaty-akshamy.kz QazAqparatqa silteme jasap.
«Geosaıası jaǵdaıdyń nasharlaýyna baılanysty qarjy jáne taýar naryqtarynda buryn-sońdy bolmaǵan shoktardyń áserimen damýshy elderdiń valútalarymen birge teńgeniń aıyrbastaý baǵamy osy jylǵy aqpanda qubylmaly boldy. Baǵamnyń negizsiz kúrt aýytqýlary kezinde qarjylyq turaqtylyq boıynsha táýekelderdi shekteý maqsatynda Ulttyq bank keı kúnderi valútalyq ıntervensıa júrgizdi. Onyń kólemi aqpanda 273,7 mln dollar boldy. Bul operasıalar týraly aqparat jedel jarıa etildi», - dedi Ulttyq bank tóraǵasy Úkimet otyrysynda.
Onyń atap ótýinshe, Ulttyq qor qarajatyn búdjetke transfertter bólý úshin konvertasıalaý operasıalary, kvazımemlekettik sektor valútasyn satý, eksporttaýshylardyń búdjetke salyqtyq tólemderi ulttyq valútaǵa qoldaý kórsetti.
«Faktorlar balansynyń negatıvti jaqqa aýysýy, naryqtardaǵy táýekel-sentıment teńgeniń dollarǵa shaqqandaǵy baǵamynyń aqpanda 495 teńgege deıin 14,2 paıyzǵa álsireýine sebep boldy. Naýryzda qosymsha sanksıalarǵa, onyń ishinde Reseıden munaı ónimderin ımporttaýǵa AQSH-tyń tyıym salýyna baılanysty Reseı rýbliniń álsireýi teńgege qysymdy kúsheıtti. Naýryzdyń basynan bastap 542 mln dollarǵa ıntervensıa júrgizildi. Bıylǵy jylǵy 14 naýryzda teńge baǵamy bir dollar úshin 511,74 teńgeni qurady», - dedi Ǵalymjan Pirmatov.