Almatyda ulttyq baıqaýdyń jeńimpazdary anyqtaldy
Almatydaǵy Qabyldaý úıinde respýblıkalyq konkýrstyń qalalyq kezeńinde úzdik atanǵandar saltanatty túrde marapattaldy. Qalanyń úlgili otbasyn anyqtaıtyn doda jyl saıynǵy dástúr boıynsha bıyl da 15 mamyr – Otbasy kúnine oraı bastalǵan edi.
Ulttyq baıqaýǵa qatysýǵa ótinimder mamyr-shilde aılarynda qabyldanǵan. Bıyl 235 otbasy qatysýǵa nıet bildirgen. Aldymen aýdandyq irikteý kezeńi ótip, qalalyq kezeńge 16 áýlet joldama aldy. Qalalyq komısıanyń sheshimimen ár aýdannan bir otbasy júldeger atandy. Solardyń arasynan bir áýlettiń mereıi ústem boldy. Mereıli otbasyǵa 800 myń teńge, aýdanaralyq kezeńde úzdik atanǵan 7 otbasyǵa 400 myń teńge aqshalaı syı berildi.
Mereıli otbasy atanyp, respýblıkalyq kezeńge joldama alǵan – Medeý aýdanynyń atynan qatysqan Kápishevter otbasy. Murat Sadanuly men Menzıpa Kárimqyzy – úsh balaly ata-ana. Úsh balasy da ata jolyn jalǵastyryp keledi. Bul áýlette úsh urpaq temirjol salasynda eńbek etip kele jatyr.
«Búgin biz «Mereıli otbasy» ulttyq konkýrsynyń qorytyndysyn shyǵaryp, jeńimpazdaryn marapattadyq. Bul baıqaý 2014 jyldan beri ótkizilip keledi. Otbasy ınstıtýtyn nasıhattap, elimizdegi ónegeli otbasylardy tanytýda óte mańyzdy baıqaý. Qalamyzda mamyr aıynda bastalyp, kóptegen otbasy baıqaýǵa qatysýǵa nıet bildirdi. Barlyǵy 235 otbasy ótinim berip, ár aýdannyń úzdik januıasy anyqtaldy. «Otan – otbasynan bastalady» degen sóz bar. Sondyqtan osyndaı otbasylardy kópshilikke nasıhattaý – barshamyzdyń mindetimiz. Jyl saıyn baıqaýǵa qyzyǵýshylyq tanytyp otyrǵandardyń qatary artyp keledi»,– deıdi Almaty qalasy Qoǵamdyq damý basqarmasynyń basshysy Aıdar Esenbekov.
• Taqyrypqa oraı
Murat KÁPİSHEV, «Mereıli otbasy» baıqaýynyń jeńimpazy:
Ulttyq jobany teledıdardan kórsetip, ylǵı aıtyp jatady. Bıyl osy baıqaýdyń uıymdastyrylǵanyna 10 jyl bolypty. «Ótinimder qabyldap jatyr» degendi estip, qatysýǵa nıet bildirdik.
Biz temirjol salasynda úsh urpaq jumys isteımiz. Meniń ákem temirjolshy bolǵan. Ol 1932 jyly osy salaǵa kelip, 1968 jyly zeınetke shyqty. Ákem men anam 8 bala tárbıelep, ósirgen. Olardyń barlyǵy áke jolyn qýyp, temirjol salasynda qyzmet ettik. Meniń 3 balam bar. Olardyń úsheýi de temirjolda qyzmet etedi. Joldasym medısına mamandyǵyn támamdaǵan. Biraq temirjol salasynda qyzmet etti. Bul jolǵy saıys óte jaqsy ótti. Uıymdastyrýshylarǵa alǵysymdy aıtamyn!