Eldegi sý tasqynyna baılanysty qazirgi tańda temirjolshylar qaýipsizdik sharalaryn kúsheıtken.
Eń aldymen magıstraldyq jeli men jasandy qurylystardyń jaǵdaıy erekshe baqylaýǵa alynǵan, dep habarlaıdy Almaty-akshamy.kz.
Astana jol dıstansıasy qaramaǵyndaǵy barlyq temirjol nysandaryn qadaǵalaýda ustap otyr. Dıstansıanyń kópir sheberi Meńdiǵalı Dáýletshınniń aıtýynsha, qazirgi tańda jol boıyndaǵy kópirler men sý ótkizetin qubyrlar, kúvetter men taýly jyralar, jolaýshylar kópirleri, t.b temirjol boıyndaǵy sýaǵarlar tazalanyp, jasandy ımarattardyń jaǵdaıy jiti tekserilýde. Olardyń bári, shóp-shalam men qoqystan tazalandy. Tasqynǵa qarsy is-sharalar aıasynda qazirgi tańda dıstansıada 6 vagon – 1 júk tıelgen jabyq vagon, temirbeton shpal tıelgen 2 platforma, rels tıelgen 1 platforma, qoı tastar tıelgen 2 vagon daıyn tur.
«Turaqty kezekshilik uıymdastyryp, temirjol boıyndaǵy sý jınalyp qalýy qaýpi bar oryndar, jalpy barlyq jol boıy tekserilýde. Kópir sheberleri, jol sheberleri, dıstansıa bastyǵynyń orynbasarlary óz telimine qaraı turaqty túrde lokomotıvpen joldyń boıyn aralap , sý jınala bastaǵan jerlerdi kórse birden onyń qaı shaqyrymda qaı telimde ornalasqanyn aıtyp arnaıy chatta habar beredi. Sosyn ol jerdegi sýdy joıýǵa jolshylar baryp, tıisti jumystardy atqarady. Eger jınalǵan sý qaýipsizdikke nuqsan keltirmeı aǵyp ketip jatsa, ony da aıtady. Bizdiń dıstansıa boıynsha qaýip joq, kún saıyn kezekshilikke shyǵyp, jaǵdaıdy qadaǵalap otyrmyz», – deıdi kópir sheberi.