Almaty qalasy Qylmystyq-atqarý júıesi departamentine qarasty №11 mekeme bastyǵynyń jedel jumys, rejım jáne kúzet jumystary jónindegi orynbasary Nurlan Kerebaev – zań mamany. Almatyda týyp-ósken.
Alǵashqy eńbek jolyn Almaly aýdany İİB ýchaskelik polısıa ınspektory qoǵamdyq qaýipsizdik bóliminiń taǵylymdamashysy bolyp bastaǵan. Óz isine adal jas maman qyzmet barysynda satylap ósip, ár jyldary jaýapty laýazymdarda boldy. Atap aıtsaq, osy aýdannyń Ákimshilik polısıa bóliminde, Jergilikti polısıa qyzmetinde, Almaty qalasy Mamandandyrylǵan kúzet qyzmeti basqarmasynda, Almaty akademıasynda abyroıly eńbek etti.
Búginde Almatydaǵy balalar kolonıasynda. Jaýapkershiligi burynǵydan da eselendi. Sebebi, bul túzeý mekemesinde áli oıy, kózqarasy bekı qoımaǵan jasóspirimder jazasyn ótep jatyr. Olardyń júris-turysyn baqylap qana qoımaı, ómirge degen kózqarasynyń qalyptasýyna, aınalasyna degen senimin, jaqsy ómirge degen úmitin joǵaltyp almaýyna atsalysady.
Temirdeı tártipke tóselgen ádilet podpolkovnıgi kezekshi bólimde kezekshi orynbasarlarynyń beınebaqylaý júıesi arqyly búkil mekemeniń aýmaǵyndaǵy qozǵalystardy qadaǵalaıdy. Bos ýaqytynda qyzmetkerlermen birlesip fýtbol oınaıdy, salaýatty ómir saltyn ustanady.
– Áriptesimiz ádilet podpolkovnıgi Nurlan Serikuly «İshki ister organdarynyń úzdigi» jáne «Polısıa» tósbelgisimen marapattalǵan. Bul qurmet onyń qyzmetine degen adaldyǵy men ýaqytpen sanaspaı, tynbaı eńbek etkeni úshin berilgen. Qazirgi kúni de abyroıly. Ol bólimindegi qyzmetkerlerdiń júıeli, tyńǵylyqty, naqty jumys atqarýyna erekshe kóńil bóledi. Sondyqtan da tájirbıesi mol azamat búkil ujym aldynda bedeldi. Mekemege jańadan kelgen tyńdaýshylarǵa da tálimger retinde bilgenimen bólisip, jol kórsetip otyrady. Ózine de, isine de jaýapkershiligi joǵary, qoǵamdyq tártipti qamtamasyz etip, turaqtylyq pen tynyshtyq jolynda qyzmet etip júrgen maman ıesiniń ómir joly, ustanymy jastarǵa úlgi bolary sózsiz, – deıdi №11 mekeme bastyǵy ádilet polkovnıgi Almat Súleımenov.