Qazaqstan Respýblıkasy İİM Ulttyq ulany «Ońtústik» óńirlik qolbasshylyǵynyń jaýyngerleri qazaq eline tanymal sportshy, rekordsmen Temir Spataevpen júzdesti. Kúsh ekstrımi boıynsha birneshe dúrkin rekord ıesimen kezdesýdi qolbasshylyqtyń Tárbıe jáne áleýmettik-quqyqtyq jumystar basqarmasy ókilderi uıymdastyrdy.
Ulttyq ulannyń 3660 áskerı bóliminde ótken is-sharaǵa 250-den asa sarbaz qatysty. Temir Spataevtyń sportta júrgenine 30 jylǵa jýyqtaǵan. Ol kezdesý barysynda bıik belesterdi tek eren eńbektiń arqasynda baǵyndyrǵanyn aıtty. Sarbazdardyń deneni shynyqtyrý jáne moraldyq daıyndyǵynyń mańyzdylyǵyn talqylap, myqty tulǵa bolyp qalyptasýdaǵy patrıotızmniń rólin atap ótti. Sondaı-aq armandarǵa jetýdiń joldarymen bólisip, quqyqtyq tártip áskeri jaýyngerlerin salaýatty ómir saltyn ustanýǵa shaqyrdy.
Temir Spataevtyń kúsh ekstrımi boıynsha kásibı túrde aınalysyp, rekord ornatyp júrgenine jeti jyldaı bolǵan.
– Sportty janym súıedi. Maqsatym – osy sport túrin elge, álemge tanytyp, jastar arasynda nasıhattaý. Óskeleń urpaqty shyńdap, bilimdi etip, patrıottyq sezimin oıatqym keledi. Sondyqtan oqýshylarmen jáne qazaq áskerindegi sarbazdarmen osylaı jıi kezdesip júrmin. Árıne, aınalysyp júrgen isimdi ózim ǵana bilsem degen oı joq. Qazaqtyń ár balasy myqty bolsyn. Biz batyr babalarymyzdyń urpaǵy ekenimizdi umytpaýymyz kerek, – deıdi kúsh ekstrımi boıynsha rekordsmen Temir Spataev.
Kezdesý kezinde qara kúsh ıesi áskerı qyzmetshiler arasynda beltemirge tartylý, gir tasyn kóterý, salmaǵy 25 keli bolatyn bolat qylyshty bir qolymen tike ustap turý sekildi jarystar uıymdastyrdy. Jaqsy nátıje kórsetken ulandyqtarǵa alyptar saıysy brendi beınelengen fýtbolkalar tartý etti.
Áskerı qyzmettegi názik jandy arýlar arasynda da bolat qylyshty bir mınýttan asa kótergen leıtenant Álıa Ábdiǵalıevaǵa temir shegeni ıip júrek pishinin jasap, syılady.
Aıta keteıik, Temir Spataev halyq arasynda «temir adam» degen laqap atpen tanymal. Ol armrestlıngten halyqaralyq deńgeıdegi sport sheberi, Azıa chempıony, Baýyrjan Momyshuly atyndaǵy «Namys» tósbelgisiniń ıegeri. Mas-restlıngten álem chempıonatynyń júldegeri. Sonymen qatar, ol «Tolaǵaı» ulttyq sport federasıasynyń negizin qalaýshy.