Almaty oblysy Tekeli qalasynda kez-kelgen adam aqsha tólemeı-aq azyq-túlik alatyn sóre ashyldy dep habarlaıdy almaty-akshamy.kz
«Jan jylýy mekeni» dep atalatyn jerde dastarqanǵa asa qajettiniń bári bar. Jetisý jeriniń isker áıelderi qolǵa alǵan qaıyrymdy sharanyń basty maqsaty adamdardyń bir-birine jylý syılap, muqtaj janǵa qol ushyn berý.
Tekeli qalasynyń turǵyny Dana Óskenbaeva - bes balanyń anasy. Kishkentaıynyń kútimimen úıde otyrǵan ol alatyn járdemaqysynyń azyq-túlikten artylmaıtynyn aıtady. Al qymbatshylyq qysqan zamanda dúken ishinen ashylǵan sóredegi taýar halyqqa naǵyz kómek dep sanaıdy.
Aı saıyn óz basym 70 myń teńgeden asa qarajatty azyq-túlikke jumsaımyn. Osy jerden tegin qant, kespe, shaı aldym. Bul - bizge úlken kómek. Osyny uıymdastyryp otyrǵan adamdarǵa alǵysymdy aıtamyn, - dedi Dana Óskenbaeva.
Uıymdastyrýshylar «Jan jylýy mekeni» dep atalatyn sórege kez kelgen adam óz úlesin qosa alatynyn aıtady. Iaǵnı, dúkenge kelgen jan satyp alǵan zatyn osy sórege qaldyrýǵa bolady. Al sharanyń negizgi maqsaty - muqtaj jandarǵa qamqorlyq kórsetý.
Bir-birimizge kómek kórsetý - basty maqsatymyz. Ár qazaǵym jalǵyzym deıdi. Tek qana baqýatty adamdar ǵana meıirimdilik kórsete almaıdy, bári kórsetý kerek. Eki shokolad alyp, bir shokoladty osynda qoıyp, bir shokoladty ózi jese, ol balalarǵa úlken tárbıe dep oılaımyn, - dedi Almaty oblystyq isker áıelder keńesiniń múshesi Almagúl Ońǵarbaeva.
Almaty oblysynyń isker áıelderi tegin azyq-túlik sóresin ázirge nan, qant, kespe, shaı sıaqty dastarqanǵa eń qajetti ónimdermen toltyrǵan. Al aldaǵy ýaqytta mundaı sórelerdi Almaty oblysynyń barlyq óńirlerinde ashsaq degen josparlary bar jáne onyń ishindegi taýarlardy da túrlendire túspek.