Sheberlerdiń qolóner buıymdary kópshilikke usynyldy
Temirden túıin túıip, aǵashtan oıý oıǵan Almaty oblysynyń qolóner sheberleri Tekeli qalasynda bas qosty, dep habarlaıdy Almaty-akshamy.kz «Habar 24» telearnasyna silteme jasap.
Kendi shaharda «Jetisý – Uly Jibek jolynyń jańǵyrýy» atty etnofestıval ótti. Ustalar, ismerler men zergerler óz buıymdaryn kópshilik nazaryna usynyp, ózara synǵa tústi.
Zaıyt Sáıdilhan ustalyq pen zergerlikti qatar meńgergen qolóner sheberi. Ol temirden báki, kezdik, qaqpan, al altyn, kúmisten áshekeılerdi jasaıdy. Júzik, saqına, bilezikterge salynǵan oıý-órnektiń ózindik máni bar deıdi zerger.
«Tortóbel múıiz qylyp jasalǵan nárse ekeýin birlestirgende qos júrek bolyp tur. Endi mynany toı jasaıtyn ul, qyzdar neke qıǵanda osyndaı júzikter salady. Al myna bilezikter syńar múıiz, toı jasamaǵan qyzdar soǵan qaraı salǵan nárseler. Al myna ájeler salady bilezikti. Tóbel múıiz qylyp, sheńber aralastyryp, núkteler salady. Órkeni óssin urpaqty bolsyn degen maǵyna bildiredi»,-deıdi qolóner sheberi Zaıyt Sáıdilhan.
Zaıyt Sáıdilhan sıaqty 30-dan asa qolóner sheberi etnofestıvalǵa qatysty. Olar quraq kórpe, kıiz ónimder, erturman men sazsyrnaı, aǵash astaý, kádesyılar men teriden jasalǵan kartınalardy kópshilik nazaryna usyndy.
«Bir jarym jyldan beri mundaı jıyn, eshteńe bolmady. Bárimiz úıde otyrdyq. Endi mine kórme uıymdastyryp, jan-jaqtan kelip kórsetip jatyr. Bizdiń qalamyzda kórsetkenine qýanyshtymyz. Burynda mundaı kórmeler Taldyqorǵanda ǵana bolatyn. Bul óte jaqsy úrdis dep oılaımyn. Keıingi jastarǵa úlgi»,-deıdi Qazaqstannyń Eńbek sińirgen mádenıet qaıratkeri Áıkesh Muqasheva.
Ulttyq ónerdiń nasıhatshylary etnofestıvalda ózara tájirbıe almasty. Salany damytýǵa qatysty ózekti máselelerdi talqylady.
«Osy qolónerimizge kómektesip, grant berse, kıip júrgen kıimimiz óte paıdaly bolǵannan keıin mynaý shetelderden alǵansha ózimizdiń óndirisimizdi damytyp shyǵarsaq pa deımiz»,-deıdi sheber Anarkúl Jamanqulqyzy.
Festıvál qorytyndysynda úzdikter anyqtalyp 9 atalym boıynsha marapattaldy. Ózge de qolóner sheberlerine alǵys hattar tabys etildi. Salaǵa serpin berý maqsatynda qoǵamdyq birlestikter men týrısik kompanıalar arasynda memorandým jasaldy.