Megapolıste múmkindigi shekteýli jandardyń arbasyn jóndeıtin ustahana ashyldy.
Bul nysan «Múmkindigi shekteýli jandarǵa arnalǵan tehnıkalyq qyzmet kórsetý ortalyǵy» dep atalady. Ortalyqty ashqan jas kásipker Dáýren Álıhan esimdi jigit. Ol osy ortalyq arqyly taǵdyrlas jarymjan jandarǵa kómek kórsetýdi oılaǵan.
«Arbadaǵy adamdardyń jaǵdaıyn jaqsy túsinemin. Keıbireýleriniń arbasy synyp, jazym bola jazdaǵan kezderi boldy. Qalamyzda mundaı ortalyq bolmaǵandyqtan, ashý kerektigin túsindik. 2020 jyldan bastap iske kiristik, memlekettik grantqa ıe boldyq. Alaıda, ol jer bizge tarlyq etkendikten, «Baqorda Stroı Sıtı» saýda ortalyǵynda 192-býtıkte óz jumysymyzdy bastadyq. Qazirgi ýaqytta jańa jobalardy qolǵa ala bastadyq. Búginde bizge elimizdiń ár óńirinen, Qyzylorda, Taldyqorǵan sekildi qalalardan tapsyrys kelip túsýde. Qazirgi ýaqytta bizde 7 birdeı adam jumys isteıdi. Biz synǵan, jaramsyz degen arbalardy jóndep, ıelerine tabys etemiz. Osy rette bizge qoldaý bildirgen ákimdikke erekshe alǵysymyzdy bildiremiz», – deıdi «Inclusion.kz» JSHS dırektory Dáýren Álıhan.
Búginde ol jobadan bólingen qarajatqa ortalyqtyń tehnıkalyq jóndeý qurylǵylary qataryn tolyqtyrǵan. Sheberhana janynan shaǵyn seh ashyp, bir mezgilde birneshe arba jóndeý múmkindigine jol ashty. Qazirgi tańda munda birneshe jandy jumyspen qamtyp otyrǵan jaıy bar.
«Múgedektigi bar tulǵalarǵa arbalar tegin berildi. Ol úshin bizdiń ortalyqqa júginip, ótinishterin qaldyrýy qajet. Bizdiń ortalyq arqyly qazirgi ýaqytta 5 myńnan astam adam kreslo-arbalardy alǵan. Zań boıynsha, arbalar 7 jylda bir ret aýystyrylady. Merzimine jetpeı buzylǵan, synǵan arbalardy jóndeý úshin bizge osyndaı ortalyqtar qajet. Qazirgi ýaqytta jigitter óz jumystaryn keńeıtip, jańa oryndar ashyp jatqan jaıy bar. Almaty qalasynda turatyn tulǵalar bizdiń mekemege kelip, osy jerden tegin kómek ala alady», – deıdi «Teń múmkindikter» ortalyǵynyń basshysy Amanat Sultanǵazıev.
Ereje boıynsha, jarymjan jandar memleket tarapynan beriletin arbaǵa jeti jylda bir ret qol jetkizedi. Alaıda, osy ýaqyt aralyǵynda arbalar buzylady, bir qurylǵysy bolsa da, isten shyǵady. Jańadan arba satyp alýǵa kóbisiniń qaltasy kótermeıdi. Al muny jóndeıtin maman tapshy, tipti joq deýge de bolady. Sondyqtan osy máseleni sheshýdi oılap, múmkindigi shekteýli jandarǵa arnalǵan tehnıkalyq qyzmet kórsetý ortalyǵynyń ashylǵany kóptiń qýanyshyna aınaldy desek, artyq aıtpaǵanymyz bolar.
Dáýrenniń sapaly jumysyna suranys joǵary. Tipti, elimizdiń ózge aımaqtarynan da tapsyrystar túsýde. Telefon arqyly habarlasyp, arba jóndep berýin suraýshylar jeterlik. Kásipker arbalardy jóndeýmen qatar jańa jobalardy júzege asyra bastaǵan. Kreslo-arbalardyń júrýine yńǵaıly bolýy úshin elektr prıstavka oılap tapqan. Shetelderde mundaı qurylǵylarǵa jalǵanǵan kreslo-arbalar 1 mln teńgeden astam baǵada satylady. Al bul jigitterden alsańyz, jalpy somasy 300 myń teńgeniń tóńireginde.
«Qazirgi ýaqytta bizder elektr arbalardy almastyratyn prıstavkalar jasap jatyrmyz. Onyń qurylymy da óte qarapaıym. Almaly-salmaly. Eshkimniń kómegin qajet etpeıdi. 30 km qashyqtyqty júrip óte alady. Eki saǵat tok kózine qoısańyz, 24 táýlik emin-erkin toqtaýsyz júre alasyz. Baǵasy da qoljetimdi. Mundaı prıstavkalardy jasaýǵa 1 apta ketedi. Qarapaıym elektr samokattardy bólshektep, kreslo-arbalarǵa yńǵaılap jasaımyz. Jyldyń qaı mezgilinde bolsyn, erkin júre alasyz», – deıdi «Inclusion.kz» JSHS dırektory Dáýren Álıhan.