Belgıadaǵy joǵarý oqy oryndarynyń biriniń stýdenti osymen tórt jyl eshqandaı kýrsqa barmaı-aq, óz betinshe qazaq tilin oqyp úırenip júr.
Jas jigit bul iste aıtarlyqtaı jetistikke jetken. Búginde ol qazaqtarmen emin-erkin sóılese alady.
Steın Romboýt Belgıadaǵy KU Leuven ýnıversıtetiniń úshinshi kýrsynda oqıdy. Ol 2018 jyly anasymen birge Qazaqstannyń ońtústigine týrıs retinde baryp qaıtqan. Jergilikti turǵyndardyń qonaqjaılyǵyna tánti bolǵan belgıalyq qazaq tilin óz betimen oqyp úırenemin degen maqsat qoıady. Qazaqshasynyń deńgeıi ázirge oıdaǵydaı emes. Degenmen jas jigit ony jetik meńgere alatynyna senimdi. «Bolashaqta Qazaqstanǵa taǵy da sapar sheksem», – deıdi.
«Men basynda YouTube jelisi arqyly qazaqsha úırendim, biraq tek qarapaıym sózderdi úırendim. Biraq sodan keıin men qazaqsha jaqsyraq bilgim keldi. Sondyqtan men qazaq tiliniń oqýlyǵyn qoldandym. Kitaptyń aty – «Colloquial Kazakh», aǵylshyn tilde jazylǵan, biraq qazaq gramatıkasyn óte jaqsy túsindiredi. Biraq bir kitap jetkiliksiz, tek gramatıkany ǵana meńgerip qoımaı, jattyǵýlar oryndaý da óte mańyzdy. Sondyqtan men onlaın qazaqtarmen sóılestim. Osylaısha, men qazaq tilimdi jaqsarta aldym», - deıdi «KU Leuven» ýnıversıtetiniń stýdenti Steın Romboýt.
Steın jańa sózderdi tez jattaý úshin uıaly telefonynda arnaıy sózdik qurǵan. Búginde onda qazaqsha 2,5 myńǵa jýyq sóz bar. Steın: «Qazaqstanda kemi bir jyl tursam», – deıdi. Óıtkeni jyldyń tórt mezgilin de tamashalaǵysy keletin kórinedi.
«Qazaqstanǵa barý – bul meniń tandaýym. Óıtkeni myna jerde kóp adam Ispanıaǵa, Italıaǵa barǵysy keledi, biraq men kóbisi bile bermeıtin elge barǵym keledi», - deıdi «KU Leuven» ýnıversıtetiniń stýdenti Steın Romboýt.
Steın ýaqytty bosqa ótkizbeı, aýdarmashy ne aǵylshyn tiliniń muǵalimi sekildi paıdaly ispen de aınalysýdy armandaıdy.