Endi zań buzýshylyqtar men jalǵan tekserý belgilerin anyqtaǵan tehnıkalyq baıqaýdyń dıagnostıkalyq kartalary joıylady, dep habarlaıdy Almaty-akshamy.kz.
Dıagnostıkalyq kartadan bas tartý kezinde avtokólik ıesine 1414 nómirine tehnıkalyq baıqaýdan qaıta ótý qajettiligi týraly SMS habarlama keledi.
BAQ.KZ málimeti boıynsha, dıagnostıkalyq kartanyń kúshin joıýdy «Mindetti tehnıkalyq qarap-tekserý» biryńǵaı aqparattyq júıesiniń Operatory jáne jumys toby júıege kelip túsetin derekterdiń monıtorıńi kezinde júzege asyrady. Atalmysh ózgerister kólik quralyn mindetti tehnıkalyq baıqaýdan ótkizýdi uıymdastyrý jáne ótkizý qaǵıdalaryna engizilgen ózgerister men tolyqtyrýlarǵa baılanysty oryn aldy.
Dıagnostıkalyq karta – tehnıkalyq baıqaýdan ótkenin rastaıtyn qujat, onsyz avtomobıl elde júre almaıdy. Kartany mindetti tehnıkalyq baıqaýdan ótý erejelerine sáıkes tehnıkalyq baıqaý ortalyqtary (operatorlar) beredi.
«Jyl saıyn biz jalǵan tehnıkalyq baıqaýdan anyqtalǵan operatorlardyń jumysyn toqtatamyz. Tek 2021 jyldyń ózinde 249 ortalyq ıesiniń júıege qol jetkizý toqtatyldy, al 2022 jyly bul kórsetkish 168-ge deıin tómendedi. Tehnıkalyq baıqaýdan ótý erejelerin buzǵan jaǵdaıda tekserý ortalyqtarynyń ıeleri ǵana emes, sonymen qatar kólik ıesiniń ózi de jaýapty. Biz jalǵan tehnıkalyq baıqaýdan ótýdi usynbaımyz, sebebi qazir tehnıkalyq baıqaý stansıasynda jumys isteýge ruqsattyń kúshi joıylyp qana qoımaı, sol uıym bergen barlyq tekserý derekteri de joıylady,- dep atap ótti «Ulttyq aqparattyq tehnologıalar» AQ Basqarma Tóraǵasy Rostıslav Konáshkın.
Aıta ketý kerek, tehnıkalyq baıqaýdan ótý erejelerine sáıkes, jańa avtokólikterdiń ıeleri 7 jyl boıy tehnıkalyq baıqaýdan ótpeıdi, qalǵandardy kólikti kelesi kezeńdilikpen tehnıkalyq baıqaý ortalyqtarynda tekserýge mindetti:
1) árbir 12 aı saıyn – shyǵarylǵan jylyn qosa alǵanda, jasy 7 jyldan asatyn, avtomobıl kóligi salasyndaǵy kásipkerlik qyzmette paıdalanylmaıtyn M1 sanattary, N1-3, O1-4, L1-7, sondaı-aq qaýipti júkterdi tasymaldaýǵa arnalǵan jáne jabdyqtalǵandardy qospaǵanda, arnaıy jáne mamandandyrylǵan kólik quraldary;
2) árbir 6 aı saıyn-avtomobıl kóligi salasynda kásipkerlik qyzmette paıdalanylatyn M1 sanattary, M2, M3, N, adamdardy tasymaldaý úshin jabdyqtalǵan, sondaı-aq qaýipti júkterdi tasymaldaýǵa arnalǵan jáne jabdyqtalǵan M1, N1-3, jáne O1-4 sanattary.
Tehnıkalyq baıqaýdan ótpegeni úshin ákimshilik aıyppul - 5 AEK (2023 jyly 17 250 teńge).
Aıta keteıik, Úkimettiń qaýlysymen «Mindetti tehnıkalyq qarap-tekserý» biryńǵaı aqparattyq júıesi aqparattyq-kommýnıkasıalyq ınfraqurylymnyń asa mańyzdy obektileriniń tizbesine engizilgen.