Cońǵy ýaqytta elimizde teatr ónerine degen qyzyǵýshylyq kúrt artqan.
Keı óner ujymdarynyń qoıylymdaryna bılet alý úshin aılap kútýge týra keledi. Mundaı tendensıaǵa ártister óte qýanyshty. Bul týraly Ortalyq komýnıkasıalar qyzmetinde ótken baspasóz máslıhatynda aıtyldy, dep habarlaıdy Almaty-akshamy.kz 24.kz-ke silteme jasap.
Halyqtyń yqylasyna bólengen Muhtar Áýezov teatrynyń ártisteri Astanaǵa kelip, 1 apta óner kórsetpekshi. Kórermenderge tańdalyp alynǵan úzdik 7 qoıylymyn usynbaq. Odan bólek, óner ujymynyń ǵımaraty bıyl kúrdeli jóndeýden ótpekshi eken.
«Qyrkúıek aıynda teatr kúrdeli jóńdeýge jabylady degen jospar bar. Eger bári josparǵa saı bolatyn bolsa, bizdiń teatrymyz negizinen búkil respýblıka boıynsha týrne jasaıdy, ıaǵnı 2 jylda respýblıkanyń barlyq ortalyǵyn aralap shyǵamyz jáne 2 jylda 6 sheteldik qalalar josparda tur», - deıdi M. Áýezov atyndaǵy Qazaq ulttyq drama teatrynyń dırektory Erkin Jýasbek.