Jan sezimin qanaǵattandyryp turý qajet. Sol úshin arnaıylap teatrǵa baryp bir tazaryp qaldyq. Sondyqtan ishki rýhty udaıy jańa tynyspen toltyrylsa quba qup eken.
Burynnan beri qoıylym kórgimiz kelip júretin. Sonyń ýaqyt-sáti ótken joly tústi. Jalǵyz emes ózim unatqan janmen bardyq. Myń táýbe! Basty maqsat – arany jaqyndastyrý, syılastyqty arttyryp ózara túsinistiktiń shamyn jaǵý. Sol dittegen nıetke bir taban jetkendeımiz.
Biz shyǵarmashylyq adamy bolyp eseptelemiz. Kóp nárseni oı eleginen ótkizip, keı tusta júrekpen qabyldaımyz. Óıtkeni jýrnalısiaınaladaǵy dúnıe beı-jaı qaraı almaıdy.
Biz bul aptanyń bir kúnin teatrǵa arnadyq. Sol nıetimiz júzege asty. Muhtar Áýezov atyndaǵy qazaq ulttyq drama teatrynyń «Súıikti meniń perishtem» qoıylymyn tamashalap qaıttyq. Áserli sátter, kórgen-túıgen, oıǵa alǵan dúnıelerdi hatqa túsirýdi jón kórdik.
Sahnanyń sáni ónerpaz
Zalda qarap otyrǵan adamǵa bári ońaı sekildi. Alaıda sahnada qulap, súrinip, jylap-syqtap, kúlip-oınap, jadyrap shat-shadyman bolatyn ol – akter men aktrısa. Basty róldegiler qalaı úılesimdi oınaıdy, dáp solaı qoıylymnyń sáni kiredi.
Aqyn Qadyr Myrza Áli akter adamnyń jansyryn óleń shýmaqtarymen ǵajap sýretteı bilipti.
Aqyn óz óleńinde:
...Adamnyń bári shetinen,
Artıs bop ketkem zaman ba!
Birqatar jurttyń jartysy,
Qara ter bolyp júr bosqa.
Bir basqa adam artısi,
Al artıs adam bir basqa – depti. Qandaı keremet óner adamynyń jansyryn jetkize bilgen. Osy jaǵyn kózben kórip, júrekpen sezindik. Áserimizdi sózben bederleý múmkin emes. Alaıda ishtegi syrdy sahnadaǵy óner adamy jetkize biledi. Biz oılaımyz sahnadan árkim óz obrazyn kórgen shyǵar. Osy sezimdi jetkize alǵan akter men aktrısa deıtin qaýymǵa myń alǵys!
Kórermen ádebin bileıik
Teatrǵa barǵan adam mádenıetti bolsa deımiz. Sahnadan ártis janyn salyp rólin somdap turǵanda oǵan qurmet qajet. Kerek deseńiz shybynnyń yzyńy estilmeýi kerek qoı. Kórermenderdiń shýlaǵany akterge úlken yńǵaısyzdyq jasaıdy. Sondaı kezde qoıylymnan maza qashady.
Osy kúni jurt ózin sypaıy ustap úırense eken. Samartfonǵa telmirmeı, sahnadaǵy qoıylymǵa mán bergeni abzal. Aqyry alyp ushyp teatr tabaldyǵyn attaǵan ekensiz, aınalaǵa kedergi jasaý ábestikke balanady. Dáp qoılym júrip jatqanda bir kisi kirip, ekinshisi shyǵyp, úshinshi taraptan bala jylap jatsa ne bolady? Sondyqtan aınalaǵa iltıpatpen qarap úıreneıik. Aspan asty eliniń fılosofy Konfýsıı «ózińe ne istegendi qalamasań, ózgege sony jasama» depti. Osydan-aq túsingen janǵa, oılanǵan mıǵa bári jetip jatyr.
Álbette teatrǵa adam jalǵyz bara qoımas. Kóbine qurby-qurdastaryn, birge oınap-kúlip júrgen dos-jarandaryn ertip barady. Sol sátte bir aýyz tynyshtyq saqtap, nazardy sahnaǵa buryp eshkimniń mazasyn almaý kerektigin eskerte bilińiz. Eger ózara daýystap sóılesip, emosıany jasyra almaıtyn bolsańyz, rýhanıat ordasyna bas suǵyp qajet emes-ti. Qaı ýaqytta ózińizdi qolǵa ustap, kem-ketik qylyqtaryńyzben jumys isteı bilesiz, sol sátte kemeldenýge barsańyz tipti qatyp ketedi. Bul ózińizdi taǵylym-tárbıege úıretetin birden-bir ádis-tásil sanalady.
Sáti túsken júzdesý
Biz teatrda Qazaqstan Halyq ártisi, áıgili rejıser Esmuhan Obaev aǵamyzdy kezdestirdik. Egde tartqan janynda, demeýshisimen birge qoltyqtasyp jaqyndap keledi. Orymyzdan turyp qurmet kórsettik. Óz jaıymyzdy berdik. Kelbetti, óńdi, mysy basatyn, ózgege uqsamaıtyn, óz salasynyń naǵyz bilgir, teatr qaıratkeri ekenine taǵy bir márte kýá boldyq. Óner jaıynda birshama tildesip úlgerdik. Qazaqtyń «shymshyq soısada qasapshy soısyn» degeni ras kórindi. Akterlerdiń sahnadaǵyn ónerin qalt jibermeı qadaǵalap otyrdy. Ara-arasynda bizge oı-pikirin aıtty. Qysqasy «bir oqpen eki qoıan atý» degen osy shyǵar. Bir jaǵynan teatrǵa tamsandyq, sondaı-aq óner qaıtartkerimen jyly áńgime órbidi. Árıne bas-aıaǵy 10 mınýttyń ishinde talaı dúnıeden habardar bolǵandaımyz. Buıyrsa bir sáti túsken kúni asyqpaı-aptyqpaı suhbatqa ýaǵdalasqandaımyz.
Negizi baıqap qarasaq, ómirde árnárse tekke emes sıaqty. Báriniń qaıyry bar. Bir is kelesiniń jolyn ashyp tur. Urymtal tusty paıdalana alsańyz, biraz sharýany shalqaıtýǵa bolatyndaı.
Túıin
Adam deıtin robot emes qoı. Kúıbeń tirshilikten qol úzý úshin, jolyn taýyp mádenı oryndarǵa baryp turǵan jón. Ágárákı óz-ózińizdi qadirlemeseńiz, ózge sizdiń kóńilińizdi kótermesi anyq. Jan-dúnıeńizdi rýhanı tazartqyńyz kelse, teatrǵa baryńyz.