Tazy men tóbetti Halyqaralyq kınologıalyq qaýymdastyqta (FCI) tirkeý qajet.
QR Prezıdentiniń is basqarýshysy Aıbek Dádebaev qazaqy ıt tuqymdary tazy men tóbetti saqtaý jáne qalpyna keltirý máseleleri boıynsha kezekti jıyn ótkizdi dep habarlaıdy Almaty-akshamy.kz basqarmanyń baspasóz qyzmetine silteme jasap.
Kezdesýde mınıstrlikterdiń basshylyq ókilderi bir aı ishinde atqarylǵan jumys barysy týraly baıandap, aldaǵy josparymen bólisti. Sarapshylarmen (kınologtar, ǵalymdar) talqylaý nátıjesinde tazy men tóbetti saqtaý jáne onyń tuqymyn qalpyna keltirýge qatysty jeke zań jobasyn ázirleý jóninde sheshim qabyldanyn aıtty.
Jıyn qorytyndysy boıynsha Ekologıa, geologıa jáne tabıǵı resýrstar mınıstrligine basqa múddeli memlekettik organdarmen birlese otyryp zań jobasynyń sońǵy nusqasyn engizý tapsyryldy. Sonymen qatar atalǵan mınıstrlik Aýyl sharýashylyǵy mınıstrligimen birlesip qazaqy ıt tuqymdary standartynyń jańa jobasyn qarastyratyn boldy.
«Alda atqarylatyn is az emes. Vedomstvoaralyq jumys tobynyń barlyq sheshimderi sarapshylarmen birge talqylanyp, olardyń pikiri eskerilýge tıis. Kezinde panajaıy bar kınologıalyq zertteý ortalyǵyn salý tapsyrylǵan edi. Ol jospar orta joldan toqtady. Endi muny sońyna deıin jetkizý kerek. Sonymen qatar, tazy men tóbetti Halyqaralyq kınologıalyq qaýymdastyqta (FCI) tirketip, olardyń shyqqan jeri retinde Qazaqstandy kórsetý rásimderin erekshe baqylaýǵa alý qajet», – dedi QR Prezıdentiniń is basqarýshysy Aıbek Dádebaev.