Almatyda Túrksib aýdanynda ornalasqan «Baým» toǵaıynda tazalyq senbiligi ótti.
Bul ıgi is – «Taza Qazaqstan» respýblıkalyq bastamasynyń negizinde «Almaty – bizdiń ortaq úıimiz» ekonaýqany aıasynda júrgizildi.
Atalǵan aksıaǵa óner adamdary, aýdan turǵyndary, belsendi azamattar, ekologıa janashyrlary, stýdentter jáne t.b. qatysty.
«Óz qalamyzdyń tazalyǵyn saqtap, aınalamyzdy taza ustap, kópshilikke ózimizdiń úlgi-ónegemizdi kórsetsek, utarymyz kóp. Jalpy alǵanda ózimizde osyndaı is-shara nátıjesinde tazalyq saqtaýdy basty orynǵa qoıǵan durys dep bilemiz», – dedi Alataý dástúrli teatrynyń trýppa jetekshisi Sattar ERÝBAEV.
Sonymen qatar Medeý tabıǵı parki dırektorynyń mindetin atqarýshy Uzaq Jambyluly ekologıalyq ahýaldy jaqsartý maqsatynda júrgizilip jatqan ister tóńireginde oı qozǵady.
«Taza Qazaqstan aksıasy boıynsha bizdiń eko Almaty, qalalyq ekologıa jáne qorshaǵan orta basqarmasy qyzmetkerleri jáne t.b. jurtpen birigip osyndaı is-shara uıymdastyryldy. «Baým» toǵaıy boıynda tazalyq jumystary jasaldy. Munyń mán-mańyzyn bilip, óskeleń urpaq kórip, keleli isterdi úırenip, tabıǵatty aıalaı bilse eken», – dedi ol.
Sondaı-aq aksıaǵa qatynasýshylar qatarynda stýdent jastar óz belsendilikterin kórsetip, keleli istiń basy-qasynda júrdi.
«Árdaıym osyndaı tazalyqqa baılanysty naýqandarǵa qatysyp turamyz. Saıabaqtardy, adamdar demalatyn oryndardy tazartý mańyzdy bolyp sanalady. Óıtkeni qala taza ári uqypty ustalsa, onda elimiz de tazarady, damı beredi dep senemiz», – dedi stýdent Erulan NURÁDİL.