Senat depýtaty Aınur Arǵynbekova densaýlyq saqtaý salasyndaǵy kadr tapshylyǵynyń óte ózekti másele ekenin atap ótti. Osyǵan baılanysty, ol Qazaqstanda qandaı mamandar jetispeıtinin de atap kórsetken, dep habarlaıdy aqshamnews.kz.
Depýtattyń pikirinshe, mamandar jetispeýshiligi tek aýyldyq jerlerde ǵana emes, elorda men oblystarda da baıqalady. Búginde densaýlyq saqtaý salasyna úlken kólemde qarjy bólingenine qaramastan, halyqtyń tolyq suranysyn qanaǵattandyrý múmkin bolmaı otyr. Kóptegen medısınalyq uıymdar materıaldyq-tehnıkalyq jaǵynan jetkilikti qamtamasyz etilse de, «Bárin kadr sheshedi» degen ustanymnyń mańyzdylyǵy áli de saqtalýda, – dedi ol.
Densaýlyq saqtaý mınıstrliginiń málimeti boıynsha, 2023 jyldyń sońynda 4 864 dáriger tapshylyǵy anyqtalǵan. Ásirese, Astana, Almaty jáne Shymkent qalalarynda dáriger tapshylyǵy baıqalady, sondaı-aq birneshe aýyl men aýdandarda da maman jetispeýshiligi bar.
Qazirgi tańda suranysqa ıe mamandyqtar qataryna terapevter, anestezıologtar jáne akýsher-gınekologtar jatady. Senator Densaýlyq saqtaý mınıstrligine osy máseleni sheshý úshin naqty sharalar qabyldaýdy usyndy.
Aınur Arǵynbekova Densaýlyq saqtaý mınıstrligine kadr resýrsy máselesi boıynsha «Halyq densaýlyǵy jáne densaýlyq saqtaý júıesi týraly» kodekske ózgerister engizý jónindegi zańnamalyq akt jobasyn Parlamentke tez arada usynýdy, densaýlyq saqtaýdyń tıimdi kadr saıasatyn qamtamasyz etý úshin jol kartasyn ázirlep bekitýdi jáne kópsalaly ýnıversıtet klınıkalaryn qurý jumystarynyń aıaqtalýyn qamtamasyz etýdi tapsyrdy.