2025 jyldyń 24 sáýir kúni – Almaty qalasy Jastar saıasaty basqarmasy jáne Naýryzbaı aýdany ákimdiginiń qoldaýymen, «Qazaqstan Adam resýrstary» jeke mekemesiniń uıymdastyrýymen Naýryzbaı aýdany demalys ortalyqtarynyń oqýshylary arasynda «Taza Qazaqstan» atty ekologıalyq aksıa sátti ótti.
Atalǵan shara tabıǵatty qorǵaý men ekologıalyq tárbıe berýge baǵyttalǵan ıgi bastamalardyń jalǵasy bolyp tabylady. Jastar qoǵamǵa paıdasyn tıgizýdi maqsat tutyp, ózderiniń belsendiligimen jáne janashyr áreketterimen erekshelendi.
Aksıa aıasynda oqýshylar Naýryzbaı aýdanyndaǵy jalǵyzbasty ájelerdiń úılerine baryp, tazalyq jumystaryn júrgizip, aýlalaryn retke keltirdi. Bul — tek fızıkalyq kómek qana emes, úlkenge qurmet kórsetýdiń, urpaqtar sabaqtastyǵynyń jáne júrekten shyqqan izgiliktiń aıqyn kórinisi. Osyndaı áreketter arqyly jastardyń boıyndaǵy tárbıeniń, meıirim men janashyrlyqtyń deńgeıi baıqaldy.
Sonymen qatar, jas eriktiler qoǵamdyq oryndar men kóshelerde tazalyq jumystaryn júrgizip, ekologıalyq mádenıetti nasıhattaýǵa óz úlesterin qosty. Bul tek qorshaǵan ortany qorǵaý emes, sonymen qatar sanaly azamat qalyptastyrý jolyndaǵy mańyzdy qadam.
«Taza Qazaqstan» – bul tazalyqtyń ǵana emes, tárbıeniń de kórinisi. Osyndaı bastamalar arqyly jastar boıyna patrıottyq rýh, azamattyq belsendilik pen qorshaǵan ortaǵa degen jaýapkershilik syndy qasıetter darytylýda.
Uıymdastyrýshylardyń aıtýynsha, mundaı áleýmettik jobalar aldaǵy ýaqytta da turaqty túrde jalǵasyn tappaq.
Sonymen qatar, Naýryzbaı aýdanynyń balalary men jastary úshin tegin úıirmelerge jazylý múmkindigi bar. Shyǵarmashylyq, sport, óner, til úırený syndy baǵyttar boıynsha damýǵa nıetti turǵyndar tómendegi baılanys nómirine habarlasa alady:
Tel: +7 707 205 42 45 Aıjan I., jobanyń úılestirýshisi