Qazaqstanda «Taza Qazaqstan» respýblıkalyq ekologıalyq aksıasy aıasynda qalalar men eldi mekenderdiń aýmaqtaryn abattandyrýdyń úlgilik qaǵıdalaryna birqatar ózgerister engizildi. Bul týraly Úkimet otyrysynda Indýstrıa jáne qurylys mınıstri Qanat Sharlapaev málimdedi. Aqshamnews.kz osy mańyzdy ózgerister týraly tolyq aqparat usynady.
Mınıstrdiń aıtýynsha, jańa qujatta negizgi uǵymdar qaıta qaralyp, birqatar jańa termınder engizilgen. Sondaı-aq eldi mekenderdegi ınfraqurylym obektilerin kútip ustaý jáne abattandyrý boıynsha is-sharalar egjeı-tegjeıli tolyqtyrylǵan.
Jańartýlar mynalardy qamtıdy:
- Jaıaý júrginshiler men múgedekterge qolaıly jaǵdaı jasaýǵa basymdyq berý;
- Velosıped ınfraqurylymyn damytý;
- Úı janýarlaryn serýendetý aýmaqtaryn tazalaý jáne bıo-dárethanalar ornatý;
- Joldardy kútip ustaý;
- Ǵımarattar men qurylystardyń syrtqy kelbetine qoıylatyn talaptardy naqtylaý.
Sonymen qatar, óńirlerdegi erekshelikterdi eskere otyryp, abattandyrýdyń óńirlik qaǵıdalary da bekitildi. Bul qaǵıdalar aýmaqtardy kútip ustaý sharalaryn kúsheıtýge jáne árbir aımaqtyń qajettilikterin qanaǵattandyrýǵa baǵyttalǵan.
Mınıstr «Qalalardy keshendi salý standarty» qujatynyń ázirlengenin de atap ótti. Bul standart jaıly qoǵamdyq keńistikterdi qurý, sapaly turǵyn úı men kópsalaly qurylysty damytý úshin nusqaýlyq retinde qarastyrylady. Qujat jergilikti atqarýshy organdarǵa qalalyq aýmaqtardy damytýdyń egjeı-tegjeıli josparlaryn ázirleýde basshylyqqa alý úshin jiberilgen.
Bul jańartýlar Qazaqstan qalalary men aýyldaryn abattandyrýdy jaqsartyp, turǵyndardyń ómir sapasyn arttyrýǵa baǵyttalǵan mańyzdy qadam bolmaq.