Búgin Almaty oblysy Tarǵap aýyly tusyndaǵy kempıng-alańda aýqymdy ekologıalyq bastama – «Taza Qazaqstan» road-estafetasynyń ashylý saltanaty ótti, - dep habarlaıdy Aqshamnews.kz.
Bir aptaǵa jalǵasatyn aýqymdy is-shara barysynda qatysýshylar Almaty, Shymkent qalalary jáne Jambyl, Túrkistan, Qyzylorda oblystary arqyly myń shaqyrymnan astam joldy eńseredi. Jobaǵa «Jastar Rýhy» jastar qanatynyń myńdaǵan belsendisi men jergilikti turǵyndar atsalysady. Aksıanyń basty maqsaty – qoǵamda jańa ekologıalyq mádenıet qalyptastyrý, tabıǵat pen tarıhı muraǵa qurmetpen qaraý jáne azamattardyń qorshaǵan orta aldyndaǵy jaýapkershiligin arttyrý.
«AMANAT» partıasynyń Atqarýshy hatshysy Dáýlet Káribek óz sózinde jahandyq ǵylymı qaýymdastyq ondaǵan jyldan beri klımattyń ózgerýi, sý tapshylyǵy, aýanyń lastanýy, orman órti, topyraqtyń qunarsyzdanýy sıaqty ekologıalyq apat qaýpi týraly dabyl qaǵyp kele jatqanyn atap ótti. Alaıda qorshaǵan ortany qorǵaýda tek memleket kúshiniń jetkiliksiz ekeni aıqyn, bul – árbir azamattyń mindeti. Sondyqtan «AMANAT» partıasy road-estafeta arqyly ár qazaqstandyqtyń tabıǵat pen tarıhı murany qorǵaýǵa úles qosa alatynyn, al birlesip áreket etsek, ekologıalyq apattyń aldyn alyp, eldi bolashaq urpaq úshin jasyl ári qaýipsiz etip saqtaı alatynymyzdy kórsetedi.
«Memleket basshysy Qasym-Jomart Toqaev atap ótkendeı, «Taza Qazaqstan» bul – bir kúndik naýqan emes, bul – bizdiń ómir saltymyz, sondyqtan tazalyq ár adamnan, ár úıden, árbir kóshe men ár qaladan bastalýy kerek. Osy sózder bizdiń ıdeıalyq tuǵyrnamamyzǵa aınaldy. Qoǵamda tabıǵatqa, tarıh pen mádenıetke, jalpy qorshaǵan ortaǵa uqypty qaraý ádetin ornyqtyrý qajet. Jastardyń boıyna naǵyz ekologıalyq patrıotızmdi sińirip, jaýapty minez-qulyq qalyptastyrý – bizdiń basty maqsatymyz», – dedi ol.
Uıymdastyrýshylardyń aıtýynsha, estafeta aıasynda tek qoqys jınaý ǵana emes, depýtattardyń halyqpen kezdesýleri, jastarǵa arnalǵan open-air is-sharalary, qoǵamdyq qabyldaýlar jáne taza aýada «Chempıondyq rýh» jattyǵýlary ótedi. Sonymen qatar «Vandalızmge jol joq!» jobasy sheńberinde «Tulǵalar tuǵyry» memorıaldyq kesheni, «Aqyrtas» saraı kesheni, «Birlik» monýmenti jáne ejelgi Saýran qalashyǵy sıaqty tarıhı nysandar tazartylyp, abattandyrylady. Osylaısha road-estafeta tabıǵatty qorǵaý, mádenı murany saqtaý jáne ekologıalyq patrıotızmdi qalyptastyrý mindetterin toǵystyrady.
«Buǵan qosa, aksıamyz mádenı-aǵartýshylyq mısıasyn da atqarady. Jastar mundaı jumystar arqyly tarıhty tereńirek tanyp qana qoımaı, tabıǵat pen mádenı muraǵa qurmetpen qaraýdy úırenedi. Sebebi kez kelgen eskertkishti búldirý – halyqtyń tarıhı jadyna qastandyq jasaýmen teń. Osydan eki jyl buryn «Jastar Rýhy» jastar qanaty vandalızmge qarsy qoǵamdyq petısıany qoldaǵan bolatyn. Keıin sol bastama vandalızmge qarsy jaýapkershilikti kúsheıtetin zańnyń negizine aınalyp, oǵan ótken jyly Memleket basshysy qol qoıdy», – dedi «Jastar Rýhy» tóraǵasy Aqerke Iskanderova.
Óz kezeginde Májilis depýtaty, «AMANAT» partıasy fraksıasynyń múshesi Nıkıta Shatalov Prezıdenttiń «Taza Qazaqstan» bastamasy aıasyndaǵy ekologıalyq estafetanyń qoǵamdyq mańyzyna toqtaldy.
«Bul estafetaǵa depýtattar da, jastar da, volonterler men jergilikti qaýym ókilderi de birdeı atsalysýda. Barlyǵynyń maqsaty – tabıǵattyń tazalyǵyn saqtaý, tarıhı-mádenı murany qorǵaý. Osyndaı ıgi bastamalar jańa ekologıalyq mádenıetti qalyptastyryp, el ishinde patrıotızm men aýyzbirshilikti arttyra túsedi. Bul – árbir azamatty eldiń keleshegine jaýapkershilikpen qaraýǵa úndeıtin qozǵalys», – dedi halyq qalaýlysy.
Aksıa aıasynda belsendiler men volonterler jol jıegin, avtoturaqtar men kempıng aýmaqtaryn tazalaıdy. Jumys kvadrokopterler arqyly júrgizilgen aerobarlaý derekterine súıene otyryp uıymdastyrylady. Jınalǵan qoqys polıgondarǵa jetkiziledi.
«Qazaqstan – ulan-ǵaıyr dalasy bar, tabıǵaty ár alýan memleket. Keń baıtaq jeri men qaıtalanbas tabıǵatymen tańǵaldyratyn el. Biraq osynaý keń kósilgen baıtaq jerimizde qoqys úıindileri kózge túsip, ásem tabıǵattyń ajaryn ketirip jatady. Ótken jyly «Jastar Rýhy» jastar qanatynyń 2 myńnan astam belsendisi men jaqtastary Astanadan Almatyǵa deıingi 1200 shaqyrymdyq joldy júrip ótip, 100 tonna qoqys jınady. Bıylǵy mindet – tek qoqys jınap qana qoımaı, ony suryptap, eldiń ekologıalyq mádenıetin damytýǵa úles qosý. Bul ıgi iske ár qazaqstandyq úles qosa alady. Respýblıkamyzdy birge taza ári jaıly mekenge aınaldyraıyq», – dedi «Qoǵamdy ekologıalyq damytý ortalyǵy» qoǵamdyq qorynyń jetekshisi Tanır Iassa.
Aıta keteıik, «Taza beısenbi» aksıasy aıasynda «AMANAT» partıasynyń músheleri men «Jastar Rýhy» belsendileri bir jarym jylǵa jetpeıtin ýaqytta 1000-nan astam lastanǵan aýmaqty tazartyp, abattandyrdy. İs-sharalarǵa 90 myńǵa jýyq adam qatysyp, 160 myń tonnadan astam qoqys shyǵaryldy.
Ekologıalyq máselelerdi sheshý – «AMANAT» partıasynyń saılaýaldy baǵdarlamasyndaǵy mańyzdy basymdyqtardyń biri. 2027 jylǵa deıin turmystyq qatty qaldyqtardy qaıta óńdeý jáne kádege jaratý úlesin 36%-ǵa deıin arttyrý, Jaıyq ózeniniń ekojúıesin qalpyna keltirý, Balqash kóline turaqty sý aǵynyn qamtamasyz etý, aýa sapasynyń ındeksin engizý, kásiporyndardyń lastaýshy zattar shyǵaryndylaryn 40%-ǵa deıin tómendetý, sondaı-aq 14 jańa sý qoımasyn salý jáne qoldanystaǵy 16 qoımany qaıta jańǵyrtý josparlanǵan.