«Taza Qazaqstan»: Almatyda ekologıalyq mádenıetti qalyptastyrýǵa baǵyttalǵan aksıa jalǵasýda
Almaty qalasynda respýblıkalyq «Taza Qazaqstan» ekologıalyq aksıasy jalǵasýda. Búgin, 12 shildede qalanyń barlyq aýdandarynda kezekti senbilik ótti. Bul sharaǵa jergilikti turǵyndar, eriktiler, qoǵam belsendileri, memlekettik organdar men jekemenshik uıym ókilderi qatysty.
Kampanıanyń maqsaty — tek aýmaqtardy sanıtarlyq tazartý ǵana emes, sonymen qatar ekologıalyq mádenıetti qalyptastyrý, azamattyq jaýapkershilik sezimin damytý.
Túrksib aýdanynda «Jas Qanat» jáne «Maıak» yqshamaýdandarynda birqatar sharalar ótkizildi: kósheler men trotýarlardy jýý, jasyl jelekterdi shabý, aryq júıesin tazalaý, qurylys qaldyqtary men basqa da qoqystardy shyǵarý jumystary uıymdastyryldy.
Túrksib aýdanynyń ákimi Baqytjan Aqjarovtyń aıtýynsha, ekologıalyq jumystar júıeli túrde júrgizilýde: — Biz aýdandy birneshe aýmaqqa bóldik. Ár apta saıyn belgili bir aýmaqta tazalyq jumystary júrgiziledi. Bul — kóbirek aýmaqty qamtýǵa ári únemi tártipti saqtaýǵa múmkindik beredi. Mundaı is-sharalar sanıtarlyq tazalyqpen qatar, qoǵamnyń ekologıaǵa degen kózqarasyn ózgertýge de yqpal etedi, — dedi ákim.
Keıbir turǵyndar senbilikke tutas otbasymen kelgen. — Bul — jaqsy ekologıalyq dástúr. Qoqysty tek synap qana qoımaı, qolǵa qolǵap kıip, qaltamyzǵa qap salyp kelip, ózimiz tazartqan jón. Men mundaı sharaǵa birneshe ret qatystym. Osyndaı senbilikterden keıin qalany basqa kózben qaraısyń, — dedi aýdan turǵyny Saltanat Bısekenova.
Túrksib aýdanyndaǵy ekologıalyq aksıaǵa shamamen 1000 adam men 14 tehnıka qatysyp, 145 m³-tan astam qoqys shyǵaryldy.
Jetisý aýdanynda da 1000 adam men 30 tehnıka qatysyp, 120 m³ qoqys tazartyldy.
Áýezov aýdanyndaǵy negizgi lokasıa — Saın–Shalápın–Momyshuly–Abaı kósheleriniń kvadraty boldy. Munda 700-den astam adam men 15 tehnıka jumyldyrylyp, 300 m³ qoqys shyǵaryldy.
Naýryzbaı aýdanynda 500-ge jýyq qatysýshy men 15 tehnıka 220 m³ qoqys shyǵardy.
Almaly aýdanynda 700-den astam adam men 25 tehnıka qatysyp, 260 m³ qoqys tazartyldy.
Bostandyq aýdanynda senbilik «Ońtústik» saıabaǵy men Ál-Farabı dańǵyly men Sanatornaıa kóshesiniń qıylysyndaǵy bos aýmaqta ótti. Munda 870 adam, 7 tehnıka jumyldyrylyp, 230 m³ qoqys shyǵaryldy.
Alataý aýdanynda (750 adam, 25 tehnıka, 260 m³ qoqys) «Shańyraq-1» yqshamaýdanynda jergilikti senbilik uıymdastyryldy.
Medeý aýdanynda (520 adam, 22 tehnıka, 330 m³ qoqys) negizgi aımaq Halyk Arena aınalasy boldy. Munda «Bólek qoqys» jáne «Ekinshi ómir» atty ekologıalyq aksıalar ótti, ınteraktıvti oıyndar men vıktorınalar uıymdastyryldy. Oǵan Eco Network negizin qalaýshy, tanymal ekoaktıvıst Evgenıı Mýhamedjanov qatysty.
Jalpy, Almaty qalasynda ótken tazalyq sharalaryna 6000-nan astam adam qatysyp, olardyń kúshimen 1865 m³ qoqys jınalyp, shyǵaryldy.