Almaty qalasyndaǵy ınvestısıa tartý jáne ınvestorlardy qoldaý jónindegi aımaqtyq uıym «Almaty Business Development Company» mekemesinde Ashyq esik kúni ótti.
Atalmysh shara qazirgi jáne áleýetti ınvestorlarmen ashyq dıalogtyń, aǵymdaǵy, perspektıvaly jobalardyń tusaýkeseri bolyp, yntymaqtastyq baǵyttardy talqylaýdyń tıimdi alańyna aınaldy. Qatysýshylar Almaty qalasynyń basshylyǵymen tikeleı baılanysyp, kókeıdegi suraqtaryn qoıdy.
Basty maqsat – ınvestısıalyq jobalarǵa keńes berý jáne qoldaý kórsetý arqyly qyzmetterdiń tolyq keshenimen tanystyrý. Ásirese qala ekonomıkasynyń basym salalaryna kóńil bólip, ınvestorlardy memlekettik jáne óńirlik qarjylandyrý baǵdarlamalary boıynsha aqparattandyrý, jobalardy júzege asyrý barysynda keshendi qoldaý kórsetý nazarǵa alynǵan.
«Qazirgi tańda jobalarǵa baǵyttalǵan jalpy ınvestısıa somasy 3,5 trln teńgeden asady. Qala ekonomıkasynyń basym salalary – prıorıtetti baǵyttar. Sonyń ishinde kósh bastap turǵan – óńdeý ónerkásibi salasy. Almatyda dál qazir eki negizgi ındýstrıalyq aımaq pen arnaıy ekonomıkalyq aımaq belsendi jumys istep jatyr. Bıyl osy óńdeý ónerkásibine qatysty 45 ınvestısıalyq jobany iske qosý josparlanǵan. Sonymen qatar biz memlekettik qarjylyq jáne qarjylaı emes qoldaý sharalaryna qalanyń turǵyndaryn kóbirek tartqymyz keledi.
Osy maqsatta «Almaty Business Development Company» qalalyq kompanıasynyń negizinde qalalyq front‑ofıs quryldy. Arhıtektýra, qala qurylysy, tehnıkalyq sharttar alý sıaqty máseleler boıynsha joǵary bilikti mamandardyń qatary jetkilikti. Bul arqyly kásipkerler men ınvestorlarǵa keshendi qoldaý kórsetiledi», – dedi Almaty qalasy kásipkerlik jáne ınvestısıalar basqarmasynyń basshysy Alısher Satybaldıev.
Alısher Satybaldıevtiń aıtýynsha, 2025 jyldyń alǵashqy bes aıynda qalaǵa tartylǵan ınvestısıalar kólemi 800 mlrd teńgeden asqan. Sondaı-aq,
«Almaty Business Development» keńsesinde ár senbi saıyn mamandar jınalyp, kreatıvti ındýstrıa, týrızm, densaýlyq saqtaý sekildi birneshe salalar boıynsha Almatyda óz jobasyn júzege asyrýǵa nıetti azamattarǵa memlekettik qoldaý sharalary týraly keshendi keńes beredi.
– 2023 jyly tek ınvestısıalarǵa baǵyttalǵan arnaıy kompanıa quryldy.
2024 jyly 2 trln teńge ınvestısıa tartý jospar oryndaldy.
2025 jyly maqsat – 2,2–2,4 trln teńgege ınvestısıa tartý. Osy maqsatqa jetý úshin: taý klasterin, óńdeý ónerkásibin, sıfrlyq sektordy damytýǵa nazar aýdardyq. Sonymen qatar ákimdik tarapynan qoldaý úshin 50,2 mlrd teńge bólindi. Investorlarǵa birneshe jeńildikter qarastyrylǵan:
1. «DAMÝ» kásipkerlikti damytý qory arqyly júzege asatyn keshendi baǵdarlama: jeńildetilgen nesıe berý, paıyzdyq mólsherlemeni sýbsıdıalaý, banktik kepildik (85%-ǵa deıin).
2. Almaty Finance jáne «Almaty» mıkroqarjy uıymy sıaqty qala qarjy ınstıtýttary: Shaǵyn ónerkásipti 7 jylǵa deıin jylyna 6%-ben 500 mln teńgege deıin qarjylandyrý.
3. «Almaty» MQU jeke jáne zańdy tulǵalarǵa 1-70 mln teńge aralyǵynda nesıe beredi, – dedi Alısher Satybaldıev.