«AMANAT» partıasynyń «Taza beısenbi» ekologıalyq aksıasy jazdyń basynda Prezıdenttiń «Taza Qazaqstan» jalpyulttyq bastamasy aıasynda bastalǵan bolatyn. Kólder men sý aıdyndarynyń aınalasyn, aýyldar men qalalardyń aýmaqtaryn qoqystan tazartý jáne qoqystardy suryptaýdan bólek, bul aksıa qorshaǵan ortany qorǵaý, sondaı-aq taza ári turaqty energıa kózderine kóshý máselelerine qoǵamnyń nazaryn aýdarýdy kózdeıdi.
Buǵan deıin Prezıdent Qasym-Jomart Toqaev «Taza Qazaqstan» jalpyulttyq aksıasyn turaqty túrde ótkizip turý týraly jarıalaǵan edi. Memleket basshysy Qazaqstan árqashan taza ári kórikti bolýy kerektigin, bul eldiń kúndelikti ómir saltyna aınalýy tıistigin atap ótti. 6 maýsymnan bastap ár beısenbi saıyn «AMANAT» partıasynyń myńdaǵan belsendileri men músheleri ártúrli aýmaqtardy qoqystan tazartyp keledi.
Máselen, «Jastar Rýhy» jastar qanatynyń músheleri Semeı qalasynda Ertis ózeniniń jaǵalaýynan eki shaqyrymnan astam aýmaqty tazartty. Eko-belsendiler 100-den astam qap qoqys jınady. Volonterlerdiń aıtýynsha, «Holodnyı klúch» aýdany eń lastanǵan aýmaqtardyń biri bolyp sanalady. Munda qalalyq JEO ornalasqan. Aksıaǵa qatysýshy Nazerke Bekmetovanyń aıtýynsha, jańa AES-tiń qurylysy ekologıany gaz ben kúldiń lastanýynan aryltady.
«Men munda erikti retinde keldim. Búgin biz Holodnyı klúch aýdanynda «Taza Qazaqstan» aksıasyna qatysyp jatyrmyz. Jalpy qatysýshylar sany shamamen 50 adam. Biz JEO aımaǵynda tazalaý jumystaryn júrgizýdemiz. Eger bul jerde AES ornalassa, meniń oıymsha, ekologıa áldeqaıda jaqsy, taza bolyp, qoqys ta azaıar edi», – dedi ol.
Atyraý oblysynyń Maqat aýylynda «AMANAT» partıasynyń 60-qa jýyq belsendisi men jaqtasy «Qamqor» lokomotıv jóndeý deposynyń ujymymen birge shamamen 1 tonna qoqys jınady. Jergilikti turǵyndardyń aıtýynsha, mundaı is-sharalar tabıǵat úshin ǵana emes, aýyl turǵyndarynyń týǵan jeriniń ıgiligi úshin birigýine de kómektesedi.
Igi isten Qostanaı qalasynyń partıa músheleri de shet qalmady, munda belsendiler qalalyq jaǵajaı mańyndaǵy saıabaq aımaǵyn qoqystan tazartty. Jergilikti turǵyn Amangeldi Kósherbaevtyń aıtýynsha, bul jaı ǵana komýnaldyq qyzmetterge kómektesý ǵana emes, sonymen qatar aksıa aıasynda ekologıany qorǵaý úshin qabyldanatyn sharalardy talqylaýǵa da múmkindik bar.
«Bul meniń qalam, sondyqtan da eger biz bolmasaq, bul jerdi kim jáne qashan tazalaıdy? Biz jastardy tabıǵatqa, múlikke, jalpy qalaǵa uqypty qaraýǵa úıretemiz. Ásirese, aýla sypyrýshylar men baǵbandardyń eńbegin qurmetteýge úgitteımiz. Budan bólek, biz qorshaǵan ortany qorǵaý, zıandy shyǵaryndylardy azaıtý týraly da sóılesemiz. Sońǵy máseleni AES qurylysy, atom energetıkasynyń damýy sheshe alady. Al bizde bul baǵytta talantty jas ǵalymdar barshylyq», – dedi ol.
Óskemen qalasynda 70-ten astam belsendi turǵyn «Kotlovan» aýdanynda 200-den astam qap qoqys jınady. Barlyq qaldyqtar suryptaýǵa jáne qaıta óńdeýge jiberildi. Partıanyń Shyǵys Qazaqstan oblystyq fılıalynyń atqarýshy hatshysynyń orynbasary Amanbaı Nurkenov birlesken tazalyq jumystary qoǵamda ekologıalyq mádenıetti qalyptastyratynyn aıtty.
Shymkentte Eńbekshi aýdanynyń Jibek joly kóshesindegi aýlalardyń birinde 100-den astam adam jınalyp, tazalyq jumystaryn júrgizdi. Olar qatty turmystyq qaldyqtardy suryptap, shóp pen qurǵaq butaqtardy jınady. Belsendilerdiń pikirinshe, qorshaǵan ortany qorǵaý jáne týǵan jerdiń tazalyǵyn saqtaý – árbir azamattyń ortaq mindeti.
Uqsas is-sharalar elimizdiń ózge óńirlerinde de ótti. Partıa músheleri osyndaı tazalyq jumystaryn ár beısenbi saıyn júrgizedi. Ár ýchaskege máslıhat depýtattary, belsendiler men bastaýysh partıa uıymdarynyń basshylary bekitilgen. Olar óz jaýapkershiligine alǵan ýchaskelerde tártip pen tazalyqty qamtamasyz etedi. Sondaı-aq qoqys jáshikterin ornatý, aýmaqtardy kógaldandyrý, joldar men trotýarlardy jóndeý sıaqty ınfraqurylymdy jaqsartý men damytý máselelerin sheshedi.