Elimizge taýyq jumyrtqalaryn syrttan ákelýge ýaqytsha tyıym salyndy, dep habarlaıdy almaty-akshamy.kz Aýyl sharýashylyǵy mınıstrligine silteme jasap.
Aıta ketý kerek, tyıym Qazaqstan Respýblıkasynyń aýmaǵy arqyly taýyq jumyrtqalarynyń tranzıtin, sondaı-aq olardyń Eýrazıalyq ekonomıkalyq odaqqa múshe bir memlekettiń aýmaǵynan Eýrazıalyq ekonomıkalyq odaqqa múshe ekinshi memlekettiń aýmaǵyna Qazaqstan Respýblıkasynyń aýmaǵy arqyly ótýine qatysty qoldanylmaıdy.
Taǵamdyq jumyrtqa ımportyna ýaqytsha tyıym kóktemgi-jazǵy kezeńde otandyq taýar óndirýshilerdi qoldaý maqsatynda engizildi.
Osy kezeńderde jumyrtqaǵa suranystyń tómendeýi baıqalady, naryqtyń qajettilikteri ónerkásiptik óndiris arqasynda jáne úı sharýashylyǵy ónimderiniń naryqta belsendi bolýymen tolyǵymen jabylady. Bul faktor qus fabrıkalarynyń qyzmetine teris áser etedi, jumyrtqa baǵasy tómendeıdi. Baǵanyń ózindik qunnan tómen túsýi kásiporyndardyń rentabeldiligine teris áser etedi. Sondaı-aq osy kezeńde jumyrtqany saqtaý merzimi qysqarady, bul rette tehnologıalyq erekshelikterge baılanysty jumyrtqa óndirý kólemi azaımaıdy, bul qoımalarda taýardyń artyq jınalýyna ákeledi, - delingen vedomstvo habarlamasynda.
Osyǵan baılanysty, otandyq taýar óndirýshilerdi qoldaý jáne ishki naryqty qorǵaý maqsatynda Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komısıada kóktemgi-jazǵy kezeńge avtomobıl kóligimen taýyq jumyrtqalaryn Qazaqstan Respýblıkasynyń aýmaǵyna ákelýge ýaqytsha shekteý sharalaryn belgileýdiń oryndylyǵy maquldanǵan bolatyn.
Buıryq 2024 jyldyń 1 mamyrynan bastap kúshine enedi.