Álemde jyl saıyn 92 mıllıon tonna kıim qoqysqa ketedi, dep habarlaıdy almaty-akshamy.kz 24KZ-ke silteme jasap. Sonyń 700 myń tonnasy Fransıaǵa tıesili. Osynshama ysyrappen kúresý úshin el bıligi kıim-keshek óndirý isi boıynsha jańa zań qabyldamaq.
Fransıa – naǵyz sán men sánqoılardyń otany. Statısıkany sóıletsek, osydan 10 jyl buryn bir turǵyn bir jylda 30 kıim alsa, qazir fransýzdar bir basyna ortasha eseppen 50 shaqty kıim alady. Bul – bir jaǵynan, ysyrap, ekinshi jaǵynan, qorshaǵan ortany lastaýshy qoqys, – deıdi sarapshylar.
Ann-Sesıl, Vıollan-ulttyq assambleıanyń depýtaty:
- Toqyma ónerkásibi barlyq parnıktik gazdar shyǵaryndylarynyń shamamen 10% quraıdy. Bul úderis osylaı jalǵasa berse, 2050 jylǵa qaraı kórsetkish 26% jetýi múmkin. Sondaı-aq polıester – eń kóp óndiriletin materıal. Ony óndirý úshin jyl saıyn 70 mıllıon barel munaı qajet.
Keıingi 30 jyl ishinde Fransıadaǵy kıim ónerkásibinde jumys oryn sany 3 esege qysqarǵan. Sebebi qymbat brendtik taýarlardy arzan ári jyldam tigiletin kıim-keshekter almastyrdy. Bul ekologıalyq turǵydan ǵana emes, ekonomıkaǵa da aıtarlyqtaı áser etedi. Osyǵa qatysty jańa zań jyldam sánge, onyń jarnamasyna shekteýler engizýdi kózdeıdi.
Gúlnur Mámejanova, dızaıner:
- Birinshiden, men óte qoldaımyn. Qazaq aıtady ǵoı «ysyrap» dep. COVID-ten keıin ne tamaqqa bolsa da, ne kıimge bolsa da, biz neǵurlym berekeli, jańaǵy sapaly deıdi ǵoı, paıdaly ómirge kele jatyrmyz. Aqyryndap. Jańaǵy eski kıimderdi laqtyrmaý, ysyrap etpeý.
Qymbat, biraq sapasy myqty kıimderdi kıip, fransýz halqy ysyrap etpeýdi jańaǵy sanaly túrde baǵalaıdy. Jańa zań arzan ári sapasyz kıimderdi shamadan tys óndirýdi shekteýdi kózdeıdi. Sondaı-aq qymbat kıim-keshekter qarapaıym tutynýshylarǵa qoljetimdi bolý úshin ishinara búdjetten arnaıy tólemder bólý jaǵy qarastyrylǵan.