QR Týrızm jáne sport mınıstrligi týrıserdiń taýly aımaqtardaǵy qaýipsizdigin qamtamasyz etý maqsatynda zańnamaǵa túzetý engizýdi usynyp otyr.
Jańa norma boıynsha týrıser jetý qıyn taýly aımaqtarǵa sapar aldynda Tótenshe jaǵdaılar mınıstrliginiń bólimshelerine óz marshrýttary týraly mindetti túrde aldyn ala habar berýge tıis, dep habarlaıdy aqshamnews.kz.
Týrızm jáne sport mınıstri Erbol Myrzabosynov Úkimet otyrysynda týrıserdiń qaýipsizdigin qamtamasyz etýge baǵyttalǵan sharalardy tanystyrdy. Bul sharalar salalyq memlekettik organdarmen birlese júzege asyrylýda. Mınıstr atap ótkendeı, ásirese jaz mezgilinde taýly jerlerdegi týrıserdiń qaýipsizdigine erekshe nazar aýdarý qajet.
Keıingi 5 jylda elimizdiń taýly aımaqtarynda 400-den astam izdestirý-qutqarý jumystary júrgizilgen. Tek byltyrǵy jazǵy maýsymnyń ózinde týrıserge qatysty 112 oqıǵa tirkelgen.
Budan bólek, qaýipsizdikti arttyrý maqsatynda Almaty mańyndaǵy shalǵaı jerlerde 18 shaǵyn úı ornatylǵan. Atalǵan úıler ondaǵan adamnyń ómirin saqtap qalýǵa kómektesti. Olar pesh, alǵashqy medısınalyq kómek qobdıshasy, qýattaǵysh qurylǵy, kórpe sekildi tótenshe jaǵdaıda shuǵyl qajetti alǵashqy kómek jınaqtarymen jabdyqtalǵan. Sonymen qatar shaǵyn úılerde spýtnıktik baılanys arqyly «112» jáne «109» qyzmetterine SOS belgisin beretin dabyl batyrmalary ornatylǵan. Osy tájirıbeni elimizdiń ózge de óńirlerinde engizý usynylýda.
Aıta keteıik, byltyr el ishinde saıahattaǵan otandyq týrıser sany 10 mıllıonnan asty. Týrızm jáne sport mınıstrligi týrıserdiń qaýipsizdigin qamtamasyz etý boıynsha júıeli sharalardy ýákiletti organdarmen birlesip jalǵastyra bermek.