Almatyda dárilerdi ekologıalyq túrde kádege jaratýǵa jol ashatyn qabyldaý pýnktteri jumys isteı bastady. Iaǵnı maýsymnan bastap megapolıstiń 36 emhanasyna arnaıy konteınerler ornatyldy. Turǵyndar koldanylmaǵan, jartylaı paıdalanylǵan nemese saqtaý merzimi ótip ketken dárilik preparattardy sol qorapqa salyp ketýine bolady.
Joba Almaty qalasy ákimdiginiń, ECO Network ekologıalyq uıymynyń jáne STADA halyqaralyq farmasevtıkalyq kompanıasynyń qoldaýymen júzege asyrylýda. Uıymdastyrýshylar dárilik zattardyń qaýipti qaldyqtar sanatyna jatatynyn aıtyp otyr. Olardyń kózin durys joımaǵan jaǵdaıda, quramyndaǵy belsendi zattar topyraq pen sýǵa ótip, onda jyldar boıy saqtalyp, tabıǵı ekojúıeni buzýy múmkin.
Proxima Research saraptamalyq kompanıasynyń málimetine súıensek, 2024 jyly Qazaqstanda 1,46 mıllıard oram dári tutynylǵan. Sonymen qatar, kóptegen preparat paıdalanylmaı qalyp, ýaqyt óte kele olardy qaýipsiz túrde joıý qajettiligi týyndaıdy. Dárilerdi qabyldaý pýnktterin qurý farmasevtıkalyq qaldyqtarǵa jaýapkershilikpen qarap, óńdeý mádenıetin qalyptastyrýǵa jáne olardyń qorshaǵan ortaǵa áserin azaıtýǵa baǵyttalǵan mańyzdy qadam ekeni sózsiz.
Qabyldaýǵa jaramdy zattarǵa tek tabletka men kapsýla, jaqpa, krem, gel, ampýla, flakon, sıroptar jáne dárilik suıyq eritindiler jatady. Shprıs, ıneler, ınfýzıalyq júıeler jáne qanmen janasqan kez-kelgen medısınalyq qaldyqtar qabyldanbaıdy, olardy arnaıy medısınalyq uıymdarda arnaýly túrde kádege jaratý qajet.
”Eýropa elderine qaraǵanda, Qazaqstanda dárilik zattardy qaýipsiz túrde kádege jaratý júıesi áli qalyptaspaǵan. Almatylyqtarǵa dárilerdi tıisti tártippen qaıta óńdeýge tapsyrýǵa bolatyn múmkindik usyna otyryp, ár azamatqa qorshaǵan ortany qorǵaýǵa óz úlesin qosý úshin jaǵdaı jasaǵymyz keledi. Búginde qajetsiz dáriler áli de qoqysqa tastalyp nemese kárizge tógilýde. Al bul ekojúıege, adam densaýlyǵyna qaýip tóndiredi. Jınalǵan dárilerdiń qaýipsiz jáne ekologıalyq talaptarǵa saı kádege asýyn arnaıy mamandandyrylǵan uıym qamtamasyz etedi. Kádege jaratý prosesi ashyq, ári baqylanatyn bolady”, – deıdi ECO Network uıymynyń negizin qalaýshy Evgenıı Muhamedjanov.