Almatyǵa jyldyń alǵashqy toqsanynda 450 myń saıahattaýshy kelgen.
Bul byltyrǵy jylmen salystyrǵanda eki esege deıin óskenin kórsetedi. Mamandar muny shahardyń tumsa tabıǵatymen, geografıalyq ornalasýymen jáne taýlarǵa jaqyndyǵymen baılanystyrady. Demalýshylarǵa qolaıly jaǵdaı jasalǵanynyń arqasynda jergilikti búdjetke túsetin salyqtyq túsimder de edáýir artqan. Bıyl onyń kólemi birden 45 paıyzǵa kóbeıipti, dep habarlaıdy Almaty-akshamy.kz qazaqstan.tv-ke silteme jasap.
Ulttyq taǵamdar ázirleýmen aınalysatyn meıramhana qyzmetkerleri sońǵy 2-3 jylda qala turǵyndary men qonaqtarynyń tamaqtaný mádenıeti ózgergenin aıtady. Tabıǵı, ártúrli qospasyz ázirlenetin asqa suranys artqan. Servıske de kóńilderi tolady.
Zarına Aıdarqyzy, Qaraǵandy qalasynyń turǵyny:
Dámdi, tátti, qyzmet kórsetý 100 paıyz.
Gúlzada Kóptikqyzy, Shymkent qalasynyń turǵyny:
Jaqsy. Beshbarmaq jedik qazir. Qymyran, qymyz iship otyrmyz. Tamaǵy jaqsy, óte dámdi. Demalǵan jerimizde de, otyrǵan ornymyzda da óte.
Nıkolas Stargardt, Germanıa azamaty:
Beshbarmaq – meniń eń súıikti asyma aınaldy. Sizderde eń dámdi taǵamdar daıyndalady. Almatyǵa úshinshi ret kelip turmyn.
Qýan Nuraqyn, tilshi:
Teńiz deńgeıinen 1100 metr bıiktikte ornalasqan Almaty alaqandaǵydaı kórinetin Kóktóbeniń orny erekshe. Qalaǵa saıahattaýshylar bul jerge mindetti túrde kóteriledi. Demalys ornyna kúnine shamamen 3500 myń adam barady.
Qala turǵyndary men qonaqtary pandemıadan keıin taýda demalǵandy, serýendegendi jón kóredi. Demalýshylardyń sózinshe, shaharda barlyq múmkindik qarastyrylǵan. Qyzmet kórsetý sapasy da jaqsarǵan.
Sýltan Jasym, Kýveıt azamaty:
Buryn sońdy Qazaqstan týraly estýim bolmasa alǵash kelýim. Búgin Almatynyń biraz jerin araladym. Halqy óte qonaqjaı eken. Adamdardyń júzinen jylylyq baıqadym.
Qambar Májıtuly, Atyraý qalasynyń turǵyny:
Kasadan bastap qalaı kóterilý kerek, qaı baǵytqa barý kerek. Avtobýspen barasyń ba, aspaly jolmen kóterilesiń be solardyń barlyǵyn aıtyp túsindirip, kelgen soń fotograftar bar, ártúrli qyzmetter kórsetip jatyr. Este qalatyndaı jaqsy áser.
Qalanyń týrızm basqarmasy sheteldik qonaqtarǵa yńǵaıly bolýy úshin aǵylshyn tilinde sóıleıtin sala mamandarynyń sanyn arttyrýdy qolǵa alǵan.
Aqmaral Nurashqyzy, qalalyq týrızm basqarmasy basshysynyń orynbasary:
Onyń ishinde kólik toraptary qyzmetiniń qyzmetkerleri bar. Shekara qyzmeti, kedendik jáne tekserý qyzmetteri bar. Jáne týrıserdiń tikeleı ózara is-qımyl jasaıtyn sala mamandary, ekskýrsovod, gıd, nusqaýshylar jáne taǵy basqalar bar.
Endi bıyl 150 shaqyrymdy quraıtyn úlken jáne shaǵyn shatqaldar demalýshylarǵa qolaıly etip jasalynbaq. Sondaı-aq úsh kempıng-aımaq bolady. Iaǵnı onda shatyr, oryndyǵy bar ústelder men ulttyq naqyshtaǵy átkenshekter qoıylmaq. Demalýshylarǵa qolaıly jaǵdaı jasalǵanynyń arqasynda osy jyldyń alǵashqy úsh aıynda-aq jergilikti búdjetke 13,4 mıllıard teńge salyq túsken. Bul ótken jylmen salystyrǵanda 45 paıyzǵa joǵary.