Almatyda Jeltoqsan oqıǵasynyń qatysýshylary stýdenttermen kezdesýler ótkizýde. Bul júzdesý keshteriniń maqsaty – jastardyń patrıottyq sezimderin nyǵaıtý, urpaqtar sabaqtastyǵyn jalǵastyrý. Kezdesýlerge megapolıstegi 20-ǵa jýyq jeltoqsan uıymynyń ókilderi qatysýda.
Olardyń qatarynda «Jeltoqsan aqıqaty», «Patrıot-1986», «Ǵasyr tarıhy. 1986 j. Jeltoqsan», «Jeltoqsan juldyzdary», «Jeltoqsan zeınetkerleri», Jeltoqsan 1986. Táýelsizdik», «Órshil rýh» sekildi uıymdardaǵy jeltoqsan oqıǵasynyń qatysýshylary bar.
Buǵan deıingi kezdesýler Almaty memlekettik avtomobıl qurylysy koleji, Almaty memlekettik týrızm jáne qonaqjaılylyq ındýstrıasy koleji, Kólik jáne komýnıkasıa koleji, Almaty memlekettik bıznes koleji jáne Inovasıalyq kolejder stýdentteri men oqytýshylary arasynda ótti. Jeltoqsan oqıǵasynyń qaharmandary jastarmen kezdesýlerde elimizdiń táýelsizdiginiń bastaýy bolǵan tarıhı oqıǵa týraly estelikterimen bólisti.
«Biz jasaǵan keste boıynsha qaladaǵy ár uıymnyń ókilderinen quralǵan 7-8 jeltoqsanshy oqý oryndaryna baryp, jastarmen kezdesedi. Olar jastarǵa Táýelsizdik bastaýy bolǵan Jeltoqsan oqıǵasynan syr shertedi. Jeltoqsanshy aǵa-apalarynyń rýhqa toly áńgimelerinen jastar ózderine ot alyp, eljandylyq sezimderi eselenýde», – deıdi kezdesýlerdi Almaty qalasy Qoǵamdyq damý basqarmasynyń qoldaýymen «Patrıottyq rýh – basty qundylyq» jobasy aıasynda uıymdastyrýshy halyqaralyq «Janashyr» qoǵamdyq qorynyń basshysy Jańyl Ápetova.
Kezdesý barysynda stýdentter men oqytýshylar Jeltoqsan qaharmandaryna suraqtar qoıyp, ashyq dıalog júrgizdi.
Sonymen qatar, jastar jeltoqsandyq aǵa-apalaryna patrıottyq rýhtaǵy konserttik baǵdarlamalar men arnaıy qoıylymdar uıymdastyryp qarsy alýda.
Rasynda, jastarǵa serpin berer múndaı kezdesýler qajet-aq. Qazaqstannyń eń basty qundylyǵy sanalatyn Táýelsizdikke jol ashqan rýhy asqaq, tamyry tereń Jeltoqsan tarıhymyzdyń bólinbes bólshegi desek, onyń mańyzyn urpaqtan urpaqqa jetkizý bárimizge bárimizge paryz.