Baǵalaý kerek baqytty!
Bıyl Qazaq eliniń egemen el bolǵanyna 30 jyl tolady. Osyǵan baılanysty qasterli Táýelsizdigimizdiń qadir-qasıetin jas urpaqqa uǵyndyrý maqsatynda saýalnamany jalǵastyryp kelemiz. Kezekti suhbat ıesi - III dárejeli «Eńbek dańqy» ordeni, Qazaq SSR Oqý mınıstrliginiń Qurmet gramotasy, birneshe medaldardyń ıegeri, ardager ustaz Ospanov Zulpyhar aǵamyz.
Bıyl ata-babalarymyzdyń ejelden ańsap ótken asyl armandarynyń biri, egemendi el bolyp, Táýelsizdik alǵanymyzǵa 30 jyl tolyp otyr. Tarıhı turǵydan alǵanda 30 jyl kóp emes sıaqty.Al atqarǵan isterge kóz júgirtsek, qyrýar jumystardyń atqarylyp jatqanyna kýá bolýdamyz. Qazaqstan osy az ýaqyttyń ishinde alpaýyt memleketter eseptesetin elge aınalyp otyr. Qazirgi tańda Táýelsiz elimizdiń kók baıraǵy aspanymyzda jelbirep, elimiz kúnnen-kúnge álemdik arenaǵa qaryshtap qadam basyp kele jatqanynyń kýási bolýdamyz.
Bul Táýelsizdik - ata-babalarymyzdyń sarǵaıyp kútken asyl armany.Táýelsizdik jolynda qurban bolǵan ata-babalarymyzdyń tógilgen qandarynyń óteýi. Nebir el basqarǵan handardyń, talaı-talaı jaýǵa atoılap shapqan batyrlarymyzdyń, jalpy, qazaq halqynyń basty armany oryndalǵan kez. Sondyqtan da Táýelsizdik tarıhyn eshqashan, eshýaqytta esten shyǵarmaýymyz qajet. Táýelsizdiktiń tarıhy men onyń qundylyqtaryn keleshek urpaqqa jetkizip otyrý bizdiń basty maqsatymyz bolýy tıis.
Táýelsiz memleket - yntymaǵy jarasqan, aýyzbirshiligi berik, óz oıyn ózderi ortaǵa salyp sheshe alatyn, jeke rámizderi bar, Ata zańyn basqa elder moıyndaǵan, ózge eldermen emin-erkin aralasyp, qarym-qatynasta bola alatyn el.
Táýelsizdik jarıalanǵannan beri kóptegen eleýli jetistikterge qol jetkizip kelemiz. Bul Elbasymyzdyń júrgizgen parasatty kóregen saıasatynyń arqasy. Prezıdentimizdiń el basqarýdaǵy nátıjeli jumystarynyń aıǵaǵy. Elimizdiń tynyshtyǵy men qaýipsizdigi, kóp ultty qazaq eliniń yntymaǵy men birligi. Elimizdiń ekonomıkasynyń qaryshtap damı túsýi. Osynyń barlyǵy halqymyzdyń jáne ózge elderdiń Qazaqstanǵa degen berik senimin arttyryp keledi. Ár eldiń bolashaq taǵdyryn aıqyndaıtyn tarıhı kezeńderi bolady. Artqa tastaǵan otyz jylǵa ne istedik degen saýalǵa jaýap izder bolsaq, tizbektep jetkizý qıyn bolary sózsiz. Táýelsizdikke qol jetkizgen alǵashqy jyldaryndaǵy ekonomıkalyq daǵdarys halyqtyń turmys jaǵdaıyna qatty áser etti. Barlyq qıyndyqtardan shyǵý joldary jedel qarastyryla bastady. Elbasynyń iskerligi men parasattylyǵynyń arqasynda elimiz aman-esen tyǵyryqtan shyqty. Endigi kezekte el ekonomıkasyn kóterip, halyqtyń ál-aýqatyn arttyrý joldary qarastyryla bastady. Bul syndardan da súrinbeı shyǵý úshin kóptegen jumystar atqaryldy. Árbir atqarǵan jumystar bul kúnderi bir-bir tarıh bolyp qalyptasty. Sol kúnderdiń árbir belesteri halqymyz úshin zor qýanysh, úlken úmit, bolashaqqa degen senimdilikti arttyrdy. Aldyńǵy býyn bizder úshin sol kúnderdiń qıynshylyǵynan kóri qýanyshy mol bolatyn. Táýelsiz el atanyp, Ata zańymyz qabyldanǵan kún, rámizderimizdiń belgilengen kezi, tól teńgemizdiń aınalymǵa engen ýaqyty, Elbasyn bekitý, Prezıdent saılaýy - osylardyń barlyǵy esimizden shyqqan emes.
Astanamyzdy Saryarqa tórine kóshirý kezinde de aıtarlyqtaı qıyndyqtar boldy. Táı-táılap endi táýelsiz el atanyp jatqan kezde astanany kóshirý Elbasymyzdyń kózsiz batyrlyǵy men bolashaqqa degen senimdiligin kórsetti. Elbasymyzdyń bastamasymen Esil boıyna el qonystandyrýdy, onyń ishinde qandas qarakózderdi kóptep tartý negizgi maqsat boldy. Qazirgi tańda Esil boıyndaǵy árbir ǵımarat óz aldyna bir tarıh. «Báıterek», Áziret Sultan meshiti, «Táýelsizdik saraıy», Ulttyq mýzeı, «Han shatyr»», Beıbitshilik jáne Kelisim» saraıy, «Bekire» kópir jáne basqada bilim, sport, óner, densaýlyq oshaqtary Astanamyzǵa ásem kórik berip otyr. Osynyń barlyǵy Astanamyzdyń gúldene túsýimen qatar, sheteldikterdiń de nazaryna ilinýde.
Búgingi kúnderde Qazaqstan ekonomıkalyq deńgeıi qalypty jaǵdaıǵa jetken, óz strategıasy bar táýelsiz, demokratıalyq, kóp ultty zaıyrly memleket.
Qazirgi tańda elimizde barlyq sala boıynsha alǵa ilgerileýshilik anyq baıqalady. Halyqtyń ál-aýqaty, turmys jaǵdaıy jaqsarǵan, qazaq tildi mektepter men balabaqshalar sany artqan. Bilim men densaýlyq salasyna óte joǵary deńgeıde mán berilip keledi. Dúnıe júzindegi kóptegen eldermen qarym-qatynasymyz kúnnen-kúnge jaqsara túsýde. Osy atqarylǵan jumystar men jetistikterimiz - Táýelsizdiktiń jemisi.
Ata-babamyzdyń ańsap ótken armandaryna búgin bizder qol jetkizip otyrǵanymyzǵa sheksiz rıza bolýymyz tıis. Olaı bolsa, Táýelsiz Qazaqstannyń ósip-órkendeýine barlyq kúsh jigerimizdi aıamaýymyz qajet.
Elimizdiń kók týy máńgilik jelbireı bersin desek, yntymaǵymyz ben birligimizdi berik ustap, jas urpaqty elin, jerin, Otanyn jan-tánimen súıe biletin azamat etip tárbıeleı bereıik! Táýelsizdik qundylyǵyn umytpaıyq, aǵaıyn!