Kitap tartý etildi
Qazaqstan Respýblıkasy Tuńǵysh Prezıdenti Kúni merekesi qarsańynda Almaty qalasy máslıhatynyń depýtaty, Nur Otan partıasy fraksıasynyń múshesi Shýhrad Shardınov S.Begalın atyndaǵy ortalyq qalalyq balalar kitaphanasyna «Táýelsiz Qazaqstan: beıbitshiliktiń, kelisimniń jáne jasampazdyqtyń 30 jyly» atty kitaptardy syılady, dep habarlaıdy Almaty-akshamy.kz
«Qazaqstanda Táýelsizdiktiń 30 jyly barysynda ulysaralyq kelisimniń biregeı modeli qalyptasty. Qazaqstan halqy Assambleıasyń jáne jalpy beıbitshilik pen kelisimniń bastaýynda Elbasy Nursultan Ábishuly Nazarbaev boldy. Salıqaly saıasattyń, Qazaqstandaǵy aýyzbirliktiń arqasynda elimiz qysqa merzim ishinde zor jetistikterge qol jetkizdi. Endigi bizdiń ortaq maqsatymyz – memlekettiligimizdi jáne qazaqstandyq patrıotızmdi ary qaraı nyǵaıtý. Búgin biz osy kitaptardy qalamyzdyń birqatar kitaphanalaryna tabystaý jóninde sheshimge keldik. Qala turǵyndary, ásirese, balalar Táýelsiz Otanymyzdyń aýyzbirlikti kúsheıtý jolyndaǵy tarıhymen tanysyp, onyń qundylyǵyn saraptaýǵa múmkindik alady. Balalar – elimizdiń jarqyn bolashaǵy. Búgingi jastar memleketimizdiń jetistikterin aldaǵy ýaqytta eselep, qazirgi tańda bastaý alǵan iri jobalar men bastamalardyń jalǵastyrýshysy bolady», - dedi maslıhat depýtaty.
Balalar kitaphanasymen qatar atalmysh kitaptar Qazaqstan Respýblıkasynyń Ulttyq kitaphanasyna, Almaty qalasy ortalyqtandyrylǵan kitaphanalar júıesine jáne A.P.Chehov atyndaǵy ortalyq qalalyq kitaphanaǵa tartý etildi.
Kitap úsh tilde shyǵarylǵan. Keń oqyrman qaýymyna qoljetimdi bolady.
Esterińizge sala keteıik, Nur Otan partıasynyń saılaýaldy baǵdarlamasyn júzege asyrý jónindegi Almaty qalalyq jol kartasynyń «Qalalyq kitaphanalardy shyǵarmashylyq ortalyqtaryna transformasıalaý arqyly tegin shyǵarmashylyq úıirmelerdiń jáne kovorkıng-ortalyqtardyń sanyn arttyrý» jónindegi tarmaqtyń iske asyrylýy depýtat Sh.A. Shardınovtyń baqylaýynda.