Qazaqstan men Qytaı arasyndaǵy taýar aınalymyn 2 ese arttyryp, 55 mln tonnaǵa jetkizý kózdelip otyr. Indýstrıa jáne ınfraqurylymdyq damý mınıstri Marat Qarabaev Beıjińge jumys sapary barysynda osylaı málimdedi, dep habarlaıdy Almaty-akshamy.kz.
24.kz málimeti boıynsha aldaǵy ýaqytta iri ınfraqurylymdyq jobalarǵa Qytaı tarapynan ınvestısıa tartý maqsaty tur. Qazaqstan – Qytaı kásipkerleri úshin ınvestısıa salýǵa qolaıly el. Beıjińde bas qosqan eki el delegasıasynyń pikiri osyǵan saıady. Otandyq 150-ge jýyq kompanıa men qytaılyq 180 bıznesmen ortaq alańda tıimdi usynystar aıtty.
- Basty maqsat – elge jańa tehnologıa tartý, elge jańa ınvestısıa tartý. Endi basym baǵyt berip otyrǵan baǵyttarymyz ol birinshisi ónerkásip, óndiris ónerkásibi, ıaǵnı óńdeý ónerkásibi ol salada biz búgin egjeı-tegjeıli mysaly qurylys materıaldaryn óndirisiniń salasyn, mysaly mashına jasaý salasyndaǵy jáne taý-ken óndirý salasyndaǵy ózimizdiń ınvestısıalyq múmkindikterimizdi kórsettik. Ekinshi basym baǵytqa myna ózimizdiń basym baǵyt berip otyrǵanymyz bul mynaý kólik salasy. Bul rette biz birneshe atap óttik jańa transkaspıılik kóliktik dálizin ıaǵnı taýarlardy Qytaıdan Eýropaǵa tasymaldaý boıynsha jańa kólik dálizin damytyp jatyrmyz,-deıdi QR Indýstrıa jáne ınfraqurylymdyq damý mınıstri Marat Qarabaev.
Onyń sheńberinde Qazaqstan aýmaǵynda birneshe iri ınfraqurylymdyq joba iske asyrý maqsaty tur. Atap aıtqanda, Aqtaý jáne Quryq portynda termınaldyq habtar qurý. Sonymen qatar Baqty-Aıagóz jańa temir joly salynyp jatyr. Beıjińdegi kezdesýge kásipkerlermen qatar 9 óńirdiń ókilderi de qatysty.
- Qytaılyq kompanıa ókilderi bizge kelip, óńirmen tanysyp ketti. Qazir jańa JEO (Jylý elektr stansıasyn) salý máselesin talqylap jatyrmyz. Energetıka mınıstrligine jáne jalpy Úkimetke usynystar engizemiz. Iaǵnı, biz qazir olardyń múmkindikterin, sharttaryn, naqty jobany qarastyramyz,-deıdi Ulytaý oblysynyń ákimi Berik Ábdiǵalıuly.
- 15 jylda men Qytaı elimen jumys istep myna birneshe sement zavotyn Qazaqstanda soqtym. Sodan taǵy birneshe zavodtar boldy. Sońǵy zavod sol osy qytaılarmen birge Qazaqstandaǵy eń birinshi shyny shyǵarý zavotynyń sol jerdiń predsedatali boldym. Qazir sol jerdiń nablúdatelnyı sovetinde jumys isteımin. Ary qaraı da osy Qytaı elimen jumysta bolyp, taǵy da kóbirek ınvestısıa jasaýǵa tyrysamyn dep oılaımyn,-dedi otandyq ınvestor Erjan Saǵymbaev.
Jalpy úsh kúnde V2V formatynda kezdesýler ótedi. Bul basqosý Qazaqstan men Qytaıdyń saýda-ekonomıkalyq áriptestigin nyǵaıtýǵa jańa serpin beredi.