Qytaı ǵalymdary tabany kúrekteı shırek ǵasyr boıy (25 jyl) ekinshi tıpti qant dıabetinen zardap shekken 59 jastaǵy naýqasty dińgekti jasýshylar terapıa kómegimen emdep jazdy.
Bul jaıynda islam.kz portaly Cell Discovery merzimdi basylymyna silteme jasaı otyryp málim etedi, dep habarlaıdy Almaty-akshamy.kz.
Naýqas er adamǵa 2021 jyly dińgekti jasýshalar transplantasıalandy. 2022 jyldan beri qan quramyndaǵy qant deńgeıin baqylaý úshin dári-dármek qabyldamady. 25 jyl boıy sýsamyrdan zardap shekken ol ınsýlın istep shyǵaratyn uıqy beziniń túgelge derlik jasýshylarynan aıyrylǵan bolatyn. Mundaı pasıentter mundaı gormonnyń ornyn toltyrý úshin udaıy ıne salýǵa májbúr bolady. Zerthanadaǵy ǵalymdar dińgekti jasýshalardan uıqy bezi jasýshalaryn jasady. Mundaı jasýshalardyń ereksheligi olar jasýshanyń kez kelgen (júıke, bulshyqet, búırek, t.b.) túrine aınalýy múmkin. Dińgekti jasýshanyń naqty qandaı jasýshaǵa aınalatyny ortasyna, dáliregi, belgili bir zattar quramyna baılanysty.
Bul zertteýde ǵalymdar uıqy bezi jasýshalaryn túrlendirý úshin belgili bir zattardy paıdalandy. Osy ýaqytqka deıin birde-bir adam qant dıabeti dertinen qutylǵan emes. Qandaǵy qant deńgeıi dári-dármekti qabyldamaı-aq ýaqytsha qalypty deńgeıge jaqyndaýy múmkin (remısıa). Onyń ózinde bul pasıentterden salystyrmaly túrde qatań dıeta men jattyǵý baǵdarlamasyn saqtaýdy qajet etedi. Ǵalymdar bul ádistiń 1 tıpti qant dıabeti bar adamdarǵa jaramaıtynyn alǵa tartyp otyr. Óıtkeni, mundaı terapıada ımýndyq júıe transplanttalǵan uıqy bezine (organızmge bógde agent retinde qarap) shabýyl jasaıdy. Sondyqtan transplantasıalanǵan jańa jasýshalardy joıyp jiberedi. Bul baǵyttaǵy zertteý álemdegi ólim-jitimniń toǵyzynshy sebebine aınalǵan qant dıabetimen aýyratyn jarty mıllıard adam úshin úlken qadam bolýy múmkin.