Ulttyq kınony qoldaý memlekettik ortalyǵy elimizdiń túkpir-túkpirinde Qazaq kınosynyń onkúndigi sharasyn jalǵastyrýda. 28 naýryzda shara Jambyl oblysynda mádenıet jáne tilderdi damytý basqarmasynyń qoldaýymen ótti.
Taraz qalalyq mádenıet úıinde uıymdastyrylǵan sharada QR Mádenıet jáne aqparat mınıstrliginiń, sondaı-aq Kıno ortalyǵynyń qoldaýymen túsirilgen «Jambyl. Jańa dáýir» fılmi kórsetildi.
«Tarıhyńdy bilmeseń, keleshekti boljaı almaısyń» degen sóz bar. Bizdiń de Jambyl oblysynda «Jambyl. Jańa dáýir» fılmin usynýymyz beker emes. Bıyl 6 jyldyǵyn atap ótken Ulttyq kıno ortalyǵynyń negizgi mısıasy – ótkennen syr tartyp, osyndaı tarıhı tulǵalarymyzdyń jarqyn murasyn jas urpaqqa nasıhattaý.
Fılmniń aty aıtyp turǵandaı, qazaq aýyz ádebıetiniń aıtýly tulǵasy, jyr alyby Jambyl Jabaev týraly. Fılmde aqynnyń ómirine áser etken aıtýly oqıǵalar sýrettelgen. Atap aıtqanda, aqyndar sleti, aqyn óleńderiniń baspasózde jarıalanýy. Sondaı-aq Jambyl Jabaevtyń Oraz Jandosovpen jáne basqa da kórnekti qaıratkerlermen kezdesýi kórsetiledi. Shara elimizdiń ózge óńirlerinde de jalǵasady. Bizdiń maqsat – aýyl-aımaqtaǵy kórermendi otandyq kınomyzben, Ortalyqtyń fılmderimen tanystyrý», – dedi Ulttyq kınony qoldaý ortalyǵynyń Basqarma Tóraǵasy Qurmanbek Jumaǵalı.
Tarıhı baıopıktiń senarısi ári qoıýshy-rejısseri – Jandos Qusaıynov. Shyǵarmashylyq top týyndyǵa kirispes buryn arhıvterdi aqtarǵanyn eskerý kerek. Ol úshin tipti Máskeýdegi muraǵattar zerttelgen.
Aıta keteıik, buǵan deıin Qazaq kınosynyń onkúndigi Qaraǵandy oblysynda ótti.