Taraz - Olımpıada oıyndarynyń Otany - ejelgi Olımpıamen baýyrlas qala atandy.
Baýyrlastyq aktisine ár 2 jyl saıyn Olımpıada alaýyn tutatý saltanaty ótetin ári grek halqy úshin qasıetti jer sanalatyn Gera ǵıbadathanasynyń aldynda qol qoıyldy, dep habarlaıdy Almaty-akshamy.kz.
Qos shahar arasynda baýyrlastyq qatynas ornatýǵa elimizdiń Grekıadaǵy elshiligi men Qazaqstan-Grekıa İskerlik Keńesi muryndyq boldy. Ejelgi Olımpıa Iýnesko-nyń álemdik mura nysandarynyń qatarynda. Halyqaralyq Olımpıada Akademıasy da osynda ornalasqan. Qos qala ákimderi óz óńirleri men isker toptary arasynda ekonomıkalyq baılanystardy nyǵaıtýǵa ýaǵdalasty.
«2 myń jyldan astam baı tarıhy bar, Shyǵys pen Batystyń halyqtary men mádenıetteriniń túıisetin jeri sanalatyn Tarazben baýyrlastyq ornatqanymyzǵa qýanyshtymyz. Endi qos qala halqynyń yntymaǵy bekip, mádenı, iskerlik baılanysymyz artady degen senimdemiz», - dedi Olımpıa qalasynyń ákimi Georgıos Georgıopýlýs.
«Sport, mádenıet salasy bilim men ǵylym salasy boıynsha da jobalar iske asyramyz degen josparymyz bar. Osy ejelgi Olımpıa qalasynyń týrızmdi damytý boıynsha istegen jumystaryn, olardyń tájirıbesin de biz jan-jaqty zerdelep, Taraz qalasynda da týrızmdi damytý boıynsha naqty jumys jasaımyz degen josparymyz bar», - deıdi Taraz qalasynyń ákimi Baqytjan Orynbekov.