Mýzyka, sport, kıno jáne taǵy basqa salalar boıynsha elimizdi álemge tanytyp júrgen otandastarymyzdyń qatary jyl sanap artyp keledi.
«Kazakh Tourism» ulttyq kompanıasy basqarma tóraǵasynyń orynbasary Qaırat Sádýaqasov otandyq tanymal tulǵalar arqyly ishki týrızmdi damytý týraly aıtty.
Bul týraly Almaty-akshamy.kz QazAqparatqa silteme jasaı otyryp habarlaıdy.
«Dımash Qudaıbergen – 2018 jyly tańdalǵan otandyq týrızmniń alǵashqy ambassadory. Biz Dımashtyń týryn uıymdastyryp, qytaılyq jankúıerler men týroperatorlardy ákeldik, keıin pandemıa bastalyp ketti. Osylaısha týrıserdi tartýdyń ádistemesi jasaldy. Bul jerde jergilikti atqarýshy organdar iske jumylýy kerek, sonyń ishinde Dımashtyń týyp-ósken jeri Aqtóbe oblysynyń ákimdigi de bar. «Kazakh Tourism» kompanıasynyń búkil eldi qamtýy múmkin emes. Ákimdikter osy baǵytta jumys isteýi kerek. Dımashtan basqa Imanbek, Gennadıı Golovkın, Aleksandr Vınokýrov taǵy basqalar týrızm ambassadory bola alady. Shetelde tanymal qazaqstandyqtardyń sany jetkilikti. Sonymen qatar ishki týrızmdi ilgeriletýde sheteldik ınflúenserlerdi tartý qajet», - deıdi Qaırat Sádýaqasov.
Spıkerdiń aıtýynsha, Shveısarıanyń tájirıbesine súıene otyryp, sheteldik juldyzdardy tartý kerek.
«Mysaly, Rodjer Federer – tenısten álem chempıony jáne Shveısarıanyń ambassadory. Biraq ol Shveısarıany jalǵyz ózi tanymal ete almaıdy. Osy oraıda olar tanymal akter Robert De Nırony tartty. Rodjer Federer men Robert Den Nıronyń sóılesken sátiniń vıdeosy barlyq jerde tarady jáne R.Federer Robert De Nırony óz eline shaqyrady. Marketıń ózara baılanys bar kezde jaqsy jumys isteıdi. Osy oraıda otandyq tanymal azamattar shetelde Qazaqstan týraly aıtyp júrse, keremet emes pe?! Sheteldik juldyzdardy tartý qajet. Ol úshin qansha qarajat qajet ekenin bilemiz», - deıdi ol.