Elímízde baspana kezegínde tūrǵan 232 myń adamnyń qūjaty zań talaptaryna saı emes.
Sondaı-aq olardyń 15 myńy dúnıeden ozǵan azamattar ekení anyqtaldy. Būl turaly Industrıya jáne ınfraqūrylymdyq damu mınıstrlígí Ortalyq kommunıkatsıyalar qyzmetínde ótken brıfıngte málím boldy, dep habarlaıdy Almaty-akshamy.kz.
Qūrylys jáne tūrǵyn úı-kommunaldyq sharuashylyq ísterí komıtetí tóraǵasynyń orynbasary Bauyrjan Qabdoldyń sózínshe, búgínde tūrǵyn úı kezegínde 646 819 qazaqstandyq azamat tūr. Sondaı-aq keıíngí jyldary olardyń qatary ūlǵaıyp keledí. Onyń aıtuynsha, 10 jyl íshínde kezek 6 esege artqan.
"Sonymen bírge halyq tarapynan atalǵan kezekke baspanasy bar azamattar tūryp jatqany turaly kóptegen shaǵym túsíp jatyr. Osyǵan baılanysty bízdíń vedomstvo Tsıfrlyq damu, ınnovatsıyalar jáne aeroǵarysh ónerkásíbí mınıstrlígímen bírlesíp, atalǵan tízímníń zań talaptarynyń sáıkestígíne taldau júrgízíldí. Onyń nátıjesínde kezekte tūrǵan 96,1 myń azamattyń keıíngí 5 jylda jeke baspanasy bolǵany, 533 adamnyń Qazaqstannyń azamattyǵy joq ekení, 91,4 myńdaı adamnyń tūrǵylyqty jerí kezekke tírkelgen óńírmen sáıkes kelmeıtíní, sondaı-aq 29 myń adamnyń tírkelmegení jáne 15,6 myń adamnyń qaıtys bolǵany anyqtalyp otyr", - dedí ol.
Vedomstvo málímetínshe, úı kezegínde tūrǵan 232 myńǵa juyq azamattyń jeke derekterí zań talaptaryna saı bolmaǵandyqtan olardy tízímnen shyǵaruǵa tura keledí.
"Atalǵan tízímdí túgendeu kezektíń qozǵalu protsesín jedeldetuge jáne rasymen de baspanaǵa mūqtaj azamattardyń qūqyqtaryn kez kelgen oǵash áreketterden qorǵauǵa múmkíndík beredí", - dep túsíndírdí Bauyrjan Qabdol.