Bıyl tamyz aıynda Mońǵolıa eliniń astanasy Ulan-Batyr qalasynda álem áıelderiniń kongresi ótedi. Bul týraly búgin SHYU plús otyrysynda Mońǵolıa prezıdenti Ýhnaagıına Hýrelsýhan málim etti, dep habarlaıdy almaty-akshamy.kz.
«SHYU plús» formatyndaǵy otyrysta Shanhaı Yntymaqtastyq uıymyna baqylaýshy elderdiń prezıdentteri de sóz alyp jatyr. Óz sózinde Ýhnaagıına Hýrelsýhan damýdyń jańa deńgeıine bet alǵan Mońǵolıa jan-jaqty yntymaqtastyqqa daıyn ekenin habarlady.
«Jýyrda Mońǵolıada parlament saılaýy ótti. Qazir bizde jańa úkimetti jasaqtaý prosesi júrip jatyr. Mońǵolıa beıbitsúıgish jáne ashyq memleket. Jáne tek qana eki jaqty ǵana emes, kóp jaqty yntymaqtastyqqa ashyq el», - dedi ol.
Ońtaıly sátti paıdalana otyryp Ýhnaagıına Hýrelsýhan Mońǵolıanyń atqaryp jatqan saıası-gýmanıtarlyq sharalary týraly aıtty. Máselen, ol atap ótkendeı, qazir Mońǵolıa mıllıard aǵash egý týraly ıdeıany iske asyryp jatyr.
«Sonymen qatar, Mońǵolıa bıyl tamyz aıynda BUU aıasynda Ulan-Batyrda álem áıelderiniń kongresin ótkizedi. Oǵan búkil álem elderiniń túrli názik jandylary jınalady», - dep habarlady ol.