Búgin Almatydaǵy 28 gvardıashy-panfılovshylar saıabaǵynda 1 qazan – Halyqaralyq qarttar kúnine arnalǵan saltanatty is-shara ótti.
Medeý aýdany ákimdigi, «Almaty jas dárigerler qaýymdastyǵy» qoǵamdyq birlestigi, Belsendi ómir súrý ortalyǵy men Ardagerler keńesi uıymdastyrǵan merekelik keshke Medeý aýdany ákiminiń orynbasary Aıdos Narlybaev, Belsendi ómir súrý ortalyǵynyń úılestirýshisi Baqtıar Kamalov, qala zeınetkerleri, ardagerler keńesi men atalmysh ortalyqtyń músheleri qatysty.
Merekelik kesh qarttarymyzdyń kóńil-kúıin kóterip, olardy bir marqaıtyp tastady. Ashyq aspan astynda áýezdi ánder shyrqalyp, kúmbirlegen kúıler oryndaldy. Ulttyq kıimmen erekshelengen «Dýman sazy» ansambliniń músheleri «Qazaqy dastarhanym» ánin oryndasa, aqynjandy analar merekege arnap óleńderin oqydy, barlyǵy birge fleshmob bıledi. Aq shaǵaladaı kıingen ata-ájelerimiz skandınavıalyq júristen jarysqa qatysyp, baqtaryn synady. Sonymen qatar, qolóner kórmeleri uıymdastyryldy.
Saltanatty is-shara tosyn syılarǵa toly boldy. «Keremet sý» jáne SKE Samalsy kompanıalary qarıalarǵa tegin sý taratyp, «A&D KZN» kompanıasy qarttarǵa tegin qan qysymyn ólsheıtin quraldar tartý etti.
Aǵa býyn ókilderiniń ómirlik tájirıbeleri men aqyl-keńesteri biz úshin qashanda qymbat. Qazynaly qarttar tek otbasynyń emes, búkil eldiń aqylshysyna aınalyp, olardyń sózi el ishindegi mańyzdy máselelerdi sheshýde zor mánge ıe.
200-ge jýyq qart qatysqan merekelik is-shara konserttik baǵdarlamalarmen jalǵasty. Kesh sońynda qatysýshylar uıymdastyrýshylarǵa tamasha kóńil-kúı syılaǵandary úshin alǵystaryn bildirdi.
TAQYRYPQA ORAI
Baqtıar KAMALOV,
Medeý aýdany «Belsendi ómir súrý ortalyǵynyń» úılestirýshisi:«Úlkenge – qurmet, kishige – izet» degen ataly sózdi urpaǵynyń boıyna sińirgen, qarıasyn qadirlep, ardagerin ardaqtaǵan elmiz. Qartyn syılap, batasyn alǵan urpaqpyz. Sondyqtan bizge tájirıbesi mol aǵa býynnyń ómir joly qashanda úlgi. Medeý aýdany ákimdigi «Belsendi ómir súrý ortalyǵymen» birge jylda osylaı Qarttar kúnin óz deńgeıinde atap ótedi. Bul mereke aýdanymyzda bir aıǵa jalǵasady. Búgingi mereke sanaly ǵumyrlaryn Otan dep, tynymsyz eńbekterimen memleketimizdiń negizin salýǵa jol ashqan aldyńǵy býyn aǵa-apalarymyzǵa arnalǵan. Olardyń ómir joldary búgingi urpaqqa úlgi.
Shárbaný NURǴALIQYZY,
Ardagerler keńesiniń sporttyq komısıa tóraıymy:Halyqaralyq deńgeıde atap ótiletin bul merekeniń elimiz úshin mańyzy zor. «Qartyn syılaǵan eldiń qazynasy mol bolady» degen qazaq ár ýaqytta qarttaryn qurmettep ótken. Búgingideı jaımashýaq kúnde bizge erekshe kóńil bólip jatqan Almaty qalasy ákimdigine jáne Medeý aýdany ákimdigine alǵys aıtamyz.
Sara DÚISEKOVA,
«A&D KZN» kompanıasynyń dırektory:Biz ardagerlerimizge qoldaý kórsetip, alǵysymyzdy bildirý úshin erekshe qaıyrymdylyq sharasyn ótkizýdi jón kórdik. 1 qazan – Almaty qalasynyń Ardagerler keńesimen birlesip, Uly Otan soǵysynyń barlyq ardagerlerine joǵary sapaly qan qysymyn ólsheıtin quraldardy syıǵa tarttyq. Bul quraldar densaýlyqty jáne júrek jumysyn baqylaýǵa kómektesedi. AND kompanıasy salaýatty ómir saltyn qoldaıdy jáne qoǵam densaýlyǵyn jaqsartýǵa árqashan daıyn.
Gúlnar TÓLEGENQYZY,
«Belsendi ómir súrý ortalyǵynyń» úılestirýshi-koordınatory:
Qarıalar – taýsylmaıtyn qazyna
Ortalyǵymyzda 380-ge tarta múshe bar. Kelýshilerdiń jas aıyrmashylyǵy ártúrli. Eń úlkeni - 85 jasta, kishisi 60-tan asqan. Munda eshkim ózin zeınetkermin dep sezinbeıdi. Apalarymyz óte belsendi. Aptanyń bes kúninde de túrli is-sharalar uıymdastyrylatyndyqtan, ortalyqtyń tirshilik qazany qaınap jatady. Tórt jerde lokasıamyz bar. Medeý aýdany ákimdiginiń uıymdastyrýymen bul jerge biz jylda kelip, osyndaı merekelik sharalar ótkizemiz.
Belsendilik tanytyp, únemi kóńildi keshter ótkizip júrgen soń bizge aýdan ákimshiligi 24 ulttyq kıim syılady. «Dýman sazy» degen ansamblimiz bar. Mundaı qamqorlyqty ardagerlerge jasalǵan qurmet dep bilemiz.
Mine, munda ortalyq músheleriniń ózderi jasaǵan buıymdarynan kórme uıymdastyryldy. Biz sondaı-aq, qala kitaphanalarymen, Ortalyq murajaılarmen tikeleı shyǵarmashylyq baılanystamyz.
Qazirgi tańda elimizde qarttarǵa kóńil bólip, úkimet tarapynan jan-jaqty qamqorlyq jasalýda. Oǵan rızamyz. Sondyqtan elimizdiń órkendeýine, urpaqtarynyń jarqyn keleshegine tilekshi qarttarymyzdyń aramyzda osylaı belsendilik tanytyp, aman-saý júrgeni biz úshin úlken qýanysh. Barlyq aǵa býyn ókilderin búgingi merekelerimen quttyqtaımyn, denderi saý, ǵumyrlary uzaq bolsyn!
Shopan ÁLIEV,
«Dýman» yqshamaýdanyndaǵy «Belsendi ómir súrý ortalyǵynyń» skandınavıalyq júris jattyqtyrýshysy:
Densaýlyǵymyz jaqsy, kóńilimiz kóterińki!
Ortalyqta 300-den astam múshemiz bar. Ol jerde sporttyń birneshe túri, bı, qolóner, kompúterlik saýattylyq, til úırený sekildi kóptegen úıirmeler bar. Sondyqtan ortalyqtyń biz úshin orny erekshe.
Jigitter bılárd oınaımyz, qyzdarymyz ıogaǵa qatysyp jatady. Túrli is-sharalarǵa qatysyp, ánimizdi aıtyp, bıimizdi bıleımiz. Jas shamamyz qatar bolǵan soń shyǵar, bir-birimizdi jaqsy túsinemiz. Barlyǵy oıymyzdaǵydaı bolǵan soń, densaýlyǵymyz jaqsy, kóńil-kúıimiz kóterińki!
Odan artyq ne kerek! Elimiz aman, jurtymyz tynysh bolsyn! Barlyǵyńyzǵa jaqsylyq tileımin!
Rysaldy AHMETOVA,
Belsendi ómir súrý ortalyǵynyń múshesi:
Jaqsy dostar taptym
Jasym 71-de. Ortalyqqa bes jyldan beri kelip júrmin. Skandınavıalyq júriske qatysyp kele jatqanyma da bes jylǵa jýyqtady. Aǵylshyn tilin úırenip jatyrmyz, bıge qatysyp júrmiz. Qazir qurbylarymyzben birge eki aınalym júgirýden jarys bolady. Soǵan qatysamyz. Sporttyń bul túri densaýlyqqa óte paıdaly eken.
Buryn jıi-jıi aýyryp qalatynmyn. Qazir ol kúnder umyt boldy. Ýaqytymyzdy kóńildi ári tıimdi ótkizemiz.
Jaqsy dostar taptyq. Biz sıaqty úlken kisilerge bul ortalyq óte qatty unaıdy. Osyndaı qamqorlyq tanytyp, jaǵdaı jasap jatqan memleketimizge rahmet aıtamyz.