Qazgıdromet málimeti boıynsha, qazanda kún sýyp, alǵashqy qar túsedi
Qazan aıy — kúzden qysqa ótetin kezeń. Eldiń basym bóliginde jańbyr, jeldiń kúsheıýi (15-25 m/s-qa deıin), soltústik, shyǵys jáne ońtústik-shyǵystyń taýly aımaqtarynda túnde jańbyr men qar kútilýde. Keıbir kúnderi antısıklonnyń áserinen jaýyn-shashyn bolmaıdy.
▪️ Birinshi onkúndikte aýa temperatýrasynyń tómendeýi kútilýde. Batys óńirlerde túnde -3+5°S, kúndiz +13+22°S shamasynda bolady.
▪️ Soltústik, ortalyq jáne shyǵys aımaqtarda túnde -1-6°S, kúndiz +5+13°S-qa deıin tómendeıdi.
▪️ Ońtústik jáne ońtústik-batysta temperatýra azdap ózgermeli: túnde +7-den +15°S-qa deıin, kúndiz +20-dan +25°S-qa deıin.
Birinshi onkúndiktiń sońyna qaraı aýa raıy qaıta jylynady. Soltústikte +10+18°S, al ońtústik jáne batys óńirlerde +20+28°S-qa deıin kóteriledi.
Ekinshi jáne úshinshi onkúndikterde eldiń soltústiginde turaqsyz aýa raıy kútiledi: jańbyr, qar aralas jańbyr, jel bolady. Ońtústik aımaqtarda jaýyn-shashyn sırek bolady, tek fronttardyń kúsheıýi kezinde jańbyr jaýýy múmkin.
Temperatýra qubylmaly bolady: batysta túnde 0-den -8°S-qa deıin, kúndiz +3-ten +12°S-qa deıin; soltústik jáne ortalyq óńirlerde túnde -1-den -10°S-qa deıin, kúndiz -2-den +5°S-qa deıin. Ońtústik aımaqtarda túnde -1-den -6°S-qa deıin tómendep, kúndiz +8-den +18°S-qa deıin saqtalady.