Almaty oblysy polısıa departamentiniń uıymdasqan qylmysqa qarsy kúres basqarmasy Talǵar aýdanynda qorqytyp alýmen jáne tonaýmen aınalysqan qylmystyq toptyń áreketine tosqaýyl qoıdy, dep habarlaıdy aqshamnews.kz.
Tergeý nátıjesinde toptyń uıymdastyrýshysy Qaınazar aýylynyń 19 jastaǵy turǵyny ekeni anyqtaldy. Olar áleýmettik jeli arqyly qurbandaryn izdegen. Top quramynda 17 jastaǵy qyz bolǵan. Ol jábirlenýshilermen tanysyp, kezdesýge usynys jasap, olardyń senimine kirgen.
Alaıda biraz ýaqyttan keıin qyzdyń "aǵalary" kelip, jábirlenýshini jalǵan aıyptaýlar arqyly qorqyta bastaǵan. Olar jynystyq qatynasqa qatysty aıyp taǵý arqyly aqsha talap etip, keı jaǵdaılarda kúsh qoldanǵan. Qaskóıler jábirlenýshilerdiń qujattary men baǵaly zattaryn tartyp alyp, qomaqty qarajat aýdarýǵa májbúrlegen.
Qylmystyq toptyń kezekti qurbany – 24 jastaǵy Almaty turǵyny. Bopsalaýshylar ony kúshtep ustap, jeke qujattary men kólik qujattaryn tartyp alǵan. Sonymen qatar, 100 000 teńge aýdarýdy talap etip, odan ári 1,4 mln teńge berýge májbúrlemek bolǵan.
Jedel izdestirý sharalary barysynda polısıa qyzmetkerleri qylmystyq toptyń múshelerin ustady. Olardyń ústinen bopsalaý deregi boıynsha qylmystyq is qozǵaldy. Jalpy sany jeti adam ustalyp, tórteýi negizgi kúdikti retinde ýaqytsha ustaý ızolátoryna qamaldy. Qazirgi ýaqytta tergeý jalǵasyp, olardyń ózge qylmystarǵa qatysy tekserilýde, – dedi oblystyq polısıa ókilderi.
Quqyq qorǵaý organdary qylmystyq toptyń ózge de qurbandary bolýy múmkin ekenin joqqa shyǵarmaıdy. Osyǵan baılanysty zardap shekkenderden polısıaǵa habarlasý suralady. Tergeý amaldary jalǵasýda.