Baǵdarlamaǵa almatylyq kórermenniń de, Eýropa elderindegi asa talǵampaz kórermenniń de kóńilinen shyqqan jańa qoıylymdar endi.
Elimizdiń Abaı atyndaǵy Ulttyq opera jáne balet teatry «Astana Opera» sahnasynda elordalyq kórermenge gastróldik spektáklderin usyna otyryp, óziniń 88-shi maýsymynyń shymyldyǵyn erekshe jaǵdaıda, tyń baǵdarlamasymen ashty, dep habarlaıdy Almaty-akshamy.kz.
Elorda turǵyndary men qonaqtary tamashalaǵan alǵashqy spektákl ıtalándyq qoıýshy rejıser, senograf, kostúmder boıynsha dızaıner Matteo Massonıdiń qoıylymyndaǵy Gaetano Donısettıdiń «Don Paskýale» operasy boldy. Opera trýppasynyń jetekshi solıseri Zarına Altynbaeva, Taır Táji, Emıl Sakavov, Artýr Gabdıev jáne Tólegen Rahymbaev sımfonıalyq orkestrdiń súıemeldeýimen kórermender zalyn ıtalándyq qushtarlyq sezimine bóledi. Donısettı operasynyń sújetinde kompozıtordyń ózi ony «úsh aktili drama-býffa» dep atady. Norına sulýdan basqa, qart Don Paskýale, onyń jas jıeni Ernesto, aılaker doktor Malatesta syndy basty keıipkerlerdi kezdestiremiz. Bul búkil oqıǵanyń qozǵaýshy kúshi. Jas ári symbatty opera solısi Taır Táji rólge qalaı enip, qart Don Paskýaleniń keıipine engeni asa qyzyqty. Emıl Sakavovtyń keıipkeri — Doktor Malatesta sahnaǵa XX ǵasyrdyń 50-shi jyldaryn jetkizý úshin Nur-Sultan qalasyna arnaıy ákelingen VESPA mopedimen shyǵady.
F.Shopenniń «Shopenıana», I.S.Bahtyń «Bah shyǵarmashylyǵyn taný», M.Raveldiń «Bolero» bir aktili úsh baleti teatry gastroliniń laıyqty jalǵasy bolyp tabyldy. Balet trýppasynyń jetekshi solıseri Janel Túkeeva, Rahym Daıyrov, Aıman Egizbaeva, Gúlvıra Qurbanova, Malıka Elshibaeva, Nargız Mırseıdova, Rústem Imanǵalıev, Baıan Beketaeva, Azamat Asqarov, Nelson Pená jáne Arhat Áshirbek ózderiniń barlyq sheberlikterin mýzykada da, horeografıada da ártúrli úsh qoıylymda joǵary deńgeıde kórsete bildi.
Frıderık Shopenniń mýzykasyna qoıylǵan «Shopenıana» — romantıkalyq balet klasıkasy. Sújetsiz spektákl – bul arman men shyndyq arasyndaǵy máńgilik qaqtyǵystar men ıdealdyqtyń jetispeýshiligi bar romantızm dáýirine eliktep jasalynǵan jumys. «Shopenıana» teatrdyń bas baletmeısteri, QR Halyq ártisi Gúljan Tútkibaevanyń horeografıasynda qoıyldy.
«Bah shyǵarmashylyǵyn taný» neoklassıkalyq baleti – bıdiń erekshe jáne kútpegen horeografıalyq tilin qamtıtyn revolúsıalyq qoıylym. Sondaı-aq, horeograf Rıkardo Amarantenyń qoıylymyndaǵy «Bolero» áıelzattyń minsiz sulýlyǵy men sezimtaldyǵyn jyrlaıdy. Klasıkalyq moderndi sahnada bolyp jatqan ár kórinisten baıqaýǵa bolady – bıshilerdiń qozǵalysy, dekorasıa men jaryqtyń túsýi kórermenniń kóńil-kúıin ózgertedi. Mýzyka, árıne, kórinistiń áserin kúsheıtedi.
Táýelsizdik kúnine oraı ótken Abaı atyndaǵy QazUOBT gastrólderiniń barlyq qoıylymy alǵash ret elorda turǵyndary men qonaqtaryna usynyldy. Talǵampaz kórermender kóńilinen shyqqandyǵy sonshalyq, spektáklderdiń barlyǵy anshlagpen ótti.