Nurlan Ermekbaev keshirim surady
Qazaqstan Prezıdenti – Joǵarǵy Bas Qolbasshy Qasym-Jomart Toqaev Qorǵanys mınıstrliginiń basshylyq quramymen kezdesý ótkizip, jańadan taǵaıyndalǵan mınıstr Murat Bektanovty tanystyrdy, dep habarlaıdy Almaty-akshamy.kz.
Memleket basshysy jańa mınıstrdiń bilimi men tájirıbesi Qarýly Kúshterge júkteletin mindetterdi oryndaýǵa septigin tıgizetinine senim bildirdi. Qasym-Jomart Toqaev ásker álemdegi jáne aımaqtaǵy kúrdeli jaǵdaıda kez kelgen syrtqy qaýip-qaterge toıtarys berýge, memleketimizdiń qaýipsizdigin qamtamasyz etýge daıyn bolýy kerek ekenin aıtty.
Prezıdent Arys pen Jambyl oblysynyń Baızaq aýdanyndaǵydaı tótenshe oqıǵalarǵa jol bermeýdiń asa mańyzdy ekenine toqtaldy. Bul rette Joǵarǵy Bas Qolbasshy oq-dári qoımalaryndaǵy qaýipsizdikti qamtamasyz etý jóninde bergen tapsyrmasyn áskerılerdiń esine salyp, bul baǵytta birqatar jumystar jasalǵanyn, degenmen áli de sheshimin kútken túıindi máselelerdiń bar ekenin atap ótti. Memleket basshysy Qorǵanys mınıstrligine birqatar mindet júktedi. Qasym-Jomart Toqaev QR Qarýly Kúshterin damytýdyń 2030 jylǵa deıingi tujyrymdamasyn tolyqtaı júzege asyrý qajet ekenine, áskerı qaýipsizdiktiń syn-qaterlerine shuǵyl áreket etý úshin basqarý organdarynyń daıyndyq is-sharalaryn jalǵastyra berýge nazar aýdardy.
Prezıdent Qarýly Kúshterdi jabdyqtaý boıynsha mindettemelerdi oryndaý barysynda otandyq qorǵanys ónerkásibi keshenimen kelisip jumys isteýdi tapsyrdy. Sonymen qatar ofıserler men kelisim-shart boıynsha alynatyn qyzmetkerlerge sapaly daıyndyq júrgizýdi qamtamasyz etýge, ofıserler men generaldar qatarynda sybaılas jemqorlyqqa jol bermeýge shaqyrdy. Joǵarǵy Bas qolbasshy oq-dári saqtaıtyn barlyq qoımalarda jáne basqa da qarý-jaraq saqtaıtyn jerlerde qaýipsizdikti qamtamasyz etý jóninde túbegeıli sheshim qabyldaýdy, sondaı-aq eldi mekenderden alys jerde oq-dári saqtaıtyn zamanaýı qoımalar salý jumystaryn jyldamdatýdy tapsyrdy. Buǵan qajetti qarajat «Qaýipsiz el» Ulttyq jobasynan qarastyrylýy tıis. Memleket basshysy jıyn sońynda jańa mınıstrge jáne barlyq áskerılerge asa jaýapty qyzmette tabys tiledi.
Taǵaıyndalǵan mınıstr Murat Bektanov Úkimet múshesi retinde ant qabyldady. Jıyn barysynda otstavkaǵa ketken burynǵy mınıstr Nurlan Ermekbaev sóz sóılep, Prezıdentten, Jambyl oblysynyń Baızaq aýdanynda bolǵan qaıǵyly oqıǵadan qaza tapqandardyń aǵaıyn-týysynan jáne zardap shekkenderden keshirim surady.