Bas júlde - Jandarbek Bulǵaqovqa buıyrdy
Taldyqorǵanda İlıas Jansúgirov atyndaǵy Mádenıet saraıynda Jambyl Jabaevtyń 175 jyldyǵyna oraı «Tógeıin jyrdy halqyma» atty halyqaralyq aıtys ótti, dep habarlaıdy Almaty-akshamy.kz QazAqparat-qa silteme jasap.
Aıtysqa aýzymen qus tistegen elimizdiń aqyndarymen qatar Qyrǵyz eliniń tókpe aıtyskerleri qatysty.
«Bul – halyqaralyq aıtys Alataýdy jaǵalaı qonystanǵan eki el arasyndaǵy ǵasyrdan jalǵasyp kele jatqan qasıetti ónerge degen qurmet. Bul – keshegi Súıinbaı men Toqtaǵul, Jambyl men Qataǵannan qalǵan máńgi syılastyq. Búgingi aıtysta Jambyl baba óneriniń jańa qyrlary jyrlanyp, aıtyskerler dostyqty tý etedi dep senemin. Osy aıtysqa Qyrǵyz elinen Qanybek Qapashuly Imanalıev bastap kelgen qadirli qonaqtarymyzǵa, aıtysker aqyndarymyzǵa «qosh keldińizder!» deımin», - degen Amandyq Batalov Qanybek Imanalıevtiń ıyǵyna shapan jaýyp, estelik syılyqtar tartý etti.
«Qazaq pen qyrǵyzdy basqalardan ózgeshe etetin ózderine tán bir bıigi bar. Ol – kıeli sóz. Biz sózdi baılyqtan da, basqadan da, tipti ómirden de bıik qoıamyz. Qazaq pen qyrǵyz jylqyǵa mingende, dombyra men qomyz tartqanda jáne aıtysqa túskende arqalanady. Rýhanı jaqyndyǵy mol qos eldiń táýelsizdigi baıandy bolyp, óneri óristeı bersin», - dedi Q.Imanalıev.
Budan ári aqyndar jerebı arqyly juptalyp, sóz saıysy bastaldy.
Eske salsaq, halyqaralyq aıtysqa el atynan Jandarbek Bulǵaqov, Muradym Mırlanov, Jalǵas Maqsutov, Aısholpan Tileýtaı, Syrym Áýezhan, Qyrǵyz aqyndarynan Amantaı Qutmanalıev, Azamat Blogonbaev, Asylbek Maratov, Baıan Akmatov, Kýbat Týkeshov qatysty.
Sóz dodasyna Halyqaralyq Túrki akademıasynyń prezıdenti Darhan Qydyráli, jazýshy, Halyqaralyq «Alash« syılyǵynyń laýreaty Jumabaı Shashtaıuly, Qyrǵyzstan Jazýshylar odaǵynyń múshesi, kompozıtor, pýblısıs, Qyrǵyzstannyń halyq ártisi Túgólbaı Qazaqov, Qazaqstannyń Mádenıet salasynyń úzdigi, aıtys aqyny Aıtaqyn Bulǵaqov, QR eńbek sińirgen qaıratkeri, «Asyl arna« telearnasynyń bas dırektory Muhametjan Tazabekov, QR Mádenıet qaıratkeri, T.Júrgenov atyndaǵy óner akademıasynyń oqytýshysy Serik Qalıev, aıtysker aqyn Balǵynbek Imashev qazylyq etti.
Júldeli oryndarǵa ıe bolyp, syılyq jáne dıplomdarmen marapattalǵandar:
Bas júlde - Jandarbek Bulǵaqov (Qazaqstan Respýblıkasy, Almaty oblysy), Asylbek Maratov (Qyrǵyz Respýblıkasy). Qos aqyn 1,5 mıllıon teńgeden aldy.
Sóz barymtasynda erekshe kózge túsken qazaq qyzy Aısholpan Tileýtaı men qyrǵyz aqyny Azamat Bolgonbaev 1-oryndy jeńip alyp, 1 mıllıon teńgeniń sertıfıkattaryn qanjyǵalady.
Ekinshi oryn – Muradym Mırlanov (Qazaqstan Respýblıkasy, Batys Qazaqstan oblysy), Kýbat Týkeshov (Qyrǵyz Respýblıkasy), qarjylaı syılyq - 700 myń teńgeden.
Úshinshi oryn – Jalǵas Maqsutov (Qazaqstan Respýblıkasy, Almaty oblysy), Amantaı Kýtmanalıev (Qyrǵyz Respýblıkasy), syıaqy kólemi - 500 myń teńge.
Yntalandyrý júldesi 300 myń teńge - Syrym Áýezhan (Qazaqstan Respýblıkasy, Almaty qalasy) men Baıan Akmatovqa (Qyrǵyz Respýblıkasy) buıyrdy.
Aıta keteıik, jyr alybyna arnalǵan sharalar aldaǵy kúnderi de jalǵasyp, «Jambyl izimen» atty ekspedısıa Almaty, Taraz, Bishkek, Máskeý, Sankt-Peterbýrg qalalaryna shyǵyp, Jambyl atamyzdyń esimin ulyqtaıtyn bolady.