Óńir kásipkerlerine memleket tarapynan kórsetiletin qoldaýlar týraly da umyt qaldyrǵan joq
Búgin oblys ákimi Beıbit Isabaev Taldyqorǵandaǵy «Atameken» kásipkerler ulttyq palatasynda bıznes qaýymdastyqpen kezdesý ótkizdi. Jıynda atqarýshy organdar men kásipkerlerdiń ózara yntymaqtastyǵy, bıznesti damytýǵa baǵyttalǵan memlekettik qoldaý sharalary, búrokratıany, kóleńkeli bıznesti boldyrmaý, bıznestiń áleýmettik jaýapkershiligi sıaqty kóptegen máseleler qozǵaldy, - dep habarlaıdy Almaty-akshamy.kz Jetisý oblysy ákiminiń baspasóz qyzmetine silteme jasap.
Beıbit Isabaev kásipkerlikti damytý memlekettik saıasattyń basym baǵyty ekenin, Prezıdenttiń adal, ashyq, ádil qoǵam qurý bastamalarynyń bıznesti órkendetýdegi yqpaly zor ekenin atap ótti. 2024 jyly jańa Salyq kodeksi engiziletinin, ony daıyndaýǵa bıznes qaýymdastyqtyń ózi de tikeleı qatysatynyn tilge tıek etti. Sonymen qatar Beıbit Isabaev Jetisý óńiriniń ekonomıkasynda basymdyq beriletin baǵyttarǵa toqtaldy. Onyń aıtýynsha, birinshiden, aýyl sharýashylyǵy daqyldaryn ósirý men óńdeý, ekinshi, óńdeý ónerkásibin damytý, úshinshiden, kólik-logıstıka salasyna basymdyq berý, tórtinshiden, týrızmdi órkendetý, besinshiden, oblystyń jańartylǵan energıa kózderin ıgerýge múmkindigi mol. Óńir kásipkerlerine memleket tarapynan kórsetiletin qoldaýlar týraly da umyt qaldyrǵan joq. Máselen, oblysta agroónerkásiptiń 4,5 myń sýbektisine 10,5 mlrd. teńge sýbsıdıa berilgen. Kásipkerlikti damytýdyń ulttyq jobasy aıasynda 2022 jylǵa 6,3 mlrd. teńge qarastyryldy. Bul rette 150 jobany qarjylandyrý josparlanǵan.
«Biz «estıtin memleket» qurýǵa den qoıdyq, sondyqtan da búgin bıznes ókilderimen kezdesip, pikirlerińizdi tyńdasaq dep, syndarly usynystaryńyzdy salany damytý josparlarynda eskersek degen maqsatynda jınalyp otyrmyz. Kásipkerlikti damytý taqyrybynda oı qosýǵa, ortaq máselelerdiń sheshimin birge talqylaýǵa kelgen barshańyzǵa alǵys aıtamyn», - dedi B.Isabaev.
Kásipkerler óz sózderinde ósirgen kókónisterin ótkizýge járdemdesý, ónim saqtaıtyn qoıma salý, áleýmettik mańyzdy azyq-túlikke jatatyn sút, aıran, qaımaq, irimshik sıaqty taǵam túrlerine sýbsıdıa qarastyrý, zańdy tulǵalardyń elektr tutyný tarıfiniń joǵarylyǵy, jylyjaı ashýǵa jer ýchaskesin bólý, shaǵyn tigin sehyna ǵımarat jaǵynan qoldaý kórsetý sıaqty kóptegen máselelerdi kóterdi. Sonymen qatar bıznes ókilderi normatıvtik quqyqtyq aktilerde, sonyń ishinde jańa salyq kodeksinde eskerilýi tıis ózekti taqyryptardy da sóz etti. Suraq-ótinishterdi muqıat tyńdaǵan oblys ákimi Beıbit Isabaev kóterilgen máselelerdiń qaı-qaısysy da eskerýsiz qalmaıtynyn aıtyp, tıisti laýazymdy tulǵalarǵa tapsyrmalar berdi. Al jergilikti jerdiń quzyryna kirmeıtin máseleler kezdesýdiń hattamasy negizinde ortalyq organdarǵa usynylatyn bolady.
Kásipkerlerdiń óz quqyqtaryn bilmeýinen, máseleni zańdy jolmen qalaı sheshý kerektigi jaıly aqparattardan beıhabarlyǵynan kóbinese jemqorlyqqa jol berilip jatady. Bul rette memlekettik organdar men bıznes ókilderiniń ózara ashyq qarym-qatynasyn qalyptastyrýdaǵy Kásipkerler ulttyq palatasynyń róli úlken. Degenmen moratorıge qaramastan, jeke azamattardyń shaǵymyn jeleý etip, bıznes sýbektilerin tekseretin memlekettik organdardyń áli de bar. Sondyqtan oblys ákimi eki jaqty birlesip sheshetin máselelerdiń mol ekenin aıta kele:
«Osyndaı kezdesýdi jylyna eki ret ótkizip turýdy usynamyn. Ekinshiden, bıznes qaýymdastyqpen turaqty baılanysta bolý úshin oblys ákimi apparaty basshysynyń orynbasary Baqytnur Baqytulyn arnaıy ýákiletti tulǵa retinde bekitemin. Bizge memlekettik organdardyń ózara birlesken is-qımyly men keshendi jumysyn qalyptastyrý kerek. Baqylaýshy organdardyń Aqsý aýdanyndaǵy «Agroholdıng Aqsý» seriktestiginiń bank esepshottaryndaǵy barlyq shyǵys operasıalaryn buǵattaýy saldarynan kásiporyn 3 aı toqtap turdy. Jumysshylarynyń jalaqysyn berý, mal azyǵyn satyp alý jaǵynan qıyndyqtar týyndady. Qazir nysan qaıta jumysqa kiristi. Osyndaı jaǵdaılardy boldyrmaý úshin memlekettik organdar bir-birimen úılesimde jumys júrgizýi kerek. Oǵan qosa bıznestiń jeke jumysshylarynyń aldyndaǵy, al iri kásiporyndar men ınvestorlardyń tutas oblys aldyndaǵy áleýmettik jaýapkershiligi bar ekenin esten shyǵarmaýymyz kerek.
Áleýmettik jaýapkershilik degenimiz – óńir halqynyń ál-aýqatyn arttyrýǵa, sonyń ishinde bıznesti tıimdi júrgizýge siz ben biz bolyp birlesip jumys isteý», - dedi Beıbit Isabaev.